ராஜ் சோமதேவா அறிக்கை பொருட்டல்ல!



செம்மணி, சித்துபாத்தி மனிதப்புதைகுழி தொடர்பில் அண்மையில் ராஜ் சோமதேவாவினால் சமர்ப்பிக்கப்பட்ட சுருக்க அறிக்கையின் அடிப்படையிலேயே செயற்படவேண்டும் என மன்று கருதவில்லை என்று யாழ்ப்பாண நீதிவான் நீதிமன்ற நீதிபதி தெரிவித்துள்ளார்.

அத்துடன் இதுவரை கண்டறியப்பட்டுள்ள எலும்புக்கூடுகளில் வயது வந்தவர்களுடையது எனக் கருதத்தக்க எலும்புக்கூடுகள் தொடர்பில் என்புமாதிரி பகுப்பாய்வை மேற்கொள்வதற்கு சட்ட மருத்துவ அதிகாரி உள்ளிட்ட குழாமுக்கு நீதிபதி அனுமதி வழங்கியுள்ளார்.

செம்மணி - சித்துபாத்தி மனிதப்புதைகுழி வழக்கு விவகாரத்தில் முன்னெடுக்கப்படவேண்டிய அடுத்தகட்ட நடவடிக்கைகள் குறித்து ஆராயும் விதமாக நேற்று  யாழ்ப்பாணம் நீதிவான் நீதிமன்றத்தில் நீதிவான் எஸ்.லெனின்குமார் தலைமையில் கலந்துரையாடல் அமர்வு நடைபெற்றது.

அமர்வில் வலிந்து காணாமலாக்கப்பட்டோரின் குடும்பத்தினர் உள்ளடங்கலாக பாதிக்கப்பட்ட தரப்பினர் சார்பில் சட்டத்தரணிகள் குழாமும் அரச தரப்பின் சார்பில் சட்ட மருத்துவ அதிகாரி எஸ்.பிரணவன், காணாமல்போனோர் பற்றிய அலுவலகத்தின் உறுப்பினர் மிராக் ரஹீம் மற்றும் குற்றப்புலனாய்வுப்பிரிவின் அதிகாரிகள் உள்ளிட்டோரும் கலந்துகொண்டனர்.

'பேராசிரியர் ராஜ் சோமதேவவினால் மன்றில் சமர்ப்பிக்கப்பட்ட முதலாம், இரண்டாம் மற்றும் மூன்றாம் அறிக்கைகளின் உள்ளடக்கங்களுக்கும் நான்காவது அறிக்கையின் உள்ளடக்கத்துக்கும் இடையில் பல்வேறு வேறுபாடுகள் காணப்படுவதாக மன்றின் கவனத்துக்குக் கொண்டுவரப்பட்டது.

எது எவ்வாறிருப்பினும் பேராசிரியர் ராஜ் சோமதேவவினால் அவரது அறிக்கை சமர்ப்பிக்கப்பட்டுள்ளது. அது அகழ்வுப்பணிகள் தொடர்பான அவரது அவதானிப்பு மற்றும் கருத்தாகவே அமைந்திருக்கிறது. எனவே அந்த அறிக்கையின் அடிப்படையிலேயே செயற்படவேண்டும் என மன்று கருதவில்லை' என அறிவித்துள்ளார்.


No comments