ட்ரம்ப் நிர்வாகத்தின் உயர்மட்ட அதிகாரிகளைக் குறிவைத்து ஈரான் தாக்குதல் திட்டமா? அமெரிக்க உளவுத்துறை எச்சரிக்கை!


'அசுத்த வெடிகுண்டு' அல்லது இரசாயன ஆயுதத் தாக்குதல் தொடர்பில் உளவுத்துறை தகவல் – உறுதியான அச்சுறுத்தல் எதுவும் இல்லை என வெள்ளை மாளிகை அறிவிப்பு

வாஷிங்டனில் உள்ள டொனால்ட் ட்ரம்ப் நிர்வாகத்தின் உயர்மட்ட அதிகாரிகளைக் குறிவைத்து, கதிரியக்கப் பொருட்களைக் கொண்ட 'அசுத்த வெடிகுண்டு' (Dirty Bomb) அல்லது இரசாயன ஆயுதத் தாக்குதலை நடத்த ஈரான் திட்டமிட்டு வருவதாக அமெரிக்க உளவுத்துறை அமைப்புகளின் புதிய தகவல்கள் தெரிவிப்பதாக சிஎன்என் (CNN) செய்தி வெளியிட்டுள்ளது.

இது தொடர்பான உளவுத்துறைத் தகவல்களை ஏழு அமெரிக்க அதிகாரிகள் உறுதிப்படுத்தியுள்ளதாகக் கூறப்படுகிறது. எனினும், திட்டமிடப்பட்டதாகக் கூறப்படும் தாக்குதலின் சரியான காலப்பகுதி மற்றும் அதன் தன்மை தொடர்பில் முழுமையான தெளிவு இல்லை.

இதற்கிடையில், அமெரிக்காவுக்கு எதிராக தற்போது நம்பகமானதும் உறுதிப்படுத்தப்பட்டதுமான உடனடி அச்சுறுத்தல் எதுவும் இல்லை என வெள்ளை மாளிகை தெரிவித்துள்ளது.

இந்தப் பின்னணியில், 'அசுத்த வெடிகுண்டு' என்றால் என்ன, அது அணுகுண்டிலிருந்து எவ்வாறு வேறுபடுகிறது, அதன் தாக்கம் எத்தகையதாக இருக்கும் என்ற கேள்விகள் சர்வதேச பாதுகாப்பு வட்டாரங்களில் கவனம் பெற்றுள்ளன.

அசுத்த வெடிகுண்டு என்றால் என்ன?

அசுத்த வெடிகுண்டு என்பது சாதாரண வெடிபொருட்களுடன் கதிரியக்கப் பொருட்களையும் இணைத்து, வெடிப்பின் மூலம் அவற்றைச் சுற்றியுள்ள பகுதியில் பரப்பும் வகையில் வடிவமைக்கப்பட்ட ஆயுதமாகும்.

இதனை வல்லுநர்கள் 'கதிரியக்கச் சிதறல் சாதனம்' (Radiological Dispersal Device) என அழைக்கின்றனர்.

இத்தகைய சாதனத்தின் ஆபத்து வெடிப்பினால் ஏற்படும் உயிரிழப்புகள் மற்றும் காயங்களுடன் மட்டும் முடிவடைவதில்லை. கதிரியக்கப் பொருட்கள் பரவுவதால் வீதிகள், கட்டிடங்கள் மற்றும் பொதுமக்கள் பயன்படுத்தும் இடங்கள் மாசுபடக்கூடும்.

அமெரிக்க அணுசக்தி ஒழுங்குமுறை ஆணையத்தின் (NRC) விளக்கத்தின்படி, இத்தகைய ஆயுதங்களின் முக்கியமான ஆபத்து பெருமளவிலான அழிவை ஏற்படுத்துவதைக் காட்டிலும், பொதுமக்களின் இயல்பு வாழ்க்கையையும் நகர்ப்புறச் செயற்பாடுகளையும் சீர்குலைப்பதாகும்.

அணுகுண்டுக்கும் அசுத்த வெடிகுண்டுக்கும் என்ன வித்தியாசம்?

அசுத்த வெடிகுண்டு அணுகுண்டுக்கு இணையான அழிவாற்றலைக் கொண்டதல்ல.

அணுகுண்டு அணுக்கரு வினையின் மூலம் மிகப்பெரிய அளவிலான ஆற்றலை வெளியிட்டு, நகரங்களையே அழிக்கக்கூடிய பேரழிவை ஏற்படுத்தும்.

ஆனால், அசுத்த வெடிகுண்டு சாதாரண வெடிபொருட்களின் வெடிப்பைப் பயன்படுத்துகிறது. அது அணுக்கருத் தொடர் வினையை ஏற்படுத்துவதில்லை. இதனால் அதன் உடனடி அழிவாற்றல் அணுகுண்டுடன் ஒப்பிடும்போது மிகவும் குறைவானதாகும்.

எனினும், வெடிப்பினால் கதிரியக்கப் பொருட்கள் பரவுவதால் குறிப்பிட்ட பகுதிகள் மாசுபடுவதுடன், அவற்றைச் சுத்திகரிப்பதற்கும் பொதுமக்களைப் பாதுகாப்பதற்கும் நீண்டகால நடவடிக்கைகள் தேவைப்படலாம்.

ஒரு நகரையே வாழ முடியாத பகுதியாக மாற்றுமா?

கோட்பாட்டளவில் பெரிய அளவிலான கதிரியக்க மாசுபாடு ஏற்படுவதற்கான சாத்தியம் இருந்தாலும், நடைமுறையில் அசுத்த வெடிகுண்டு ஒன்றினால் முழு நகரத்தையும் வாழ முடியாத பகுதியாக மாற்றிவிடுவது பொதுவான எதிர்பார்ப்பு அல்ல என வல்லுநர்கள் தெரிவிக்கின்றனர்.

கதிரியக்கப் பொருளின் தன்மை, அளவு, வானிலை மற்றும் சுற்றுச்சூழல் நிலைமைகள் ஆகியவற்றைப் பொறுத்து மாசுபாட்டின் பரவல் வேறுபடும்.

இதனால் குறிப்பிட்ட வீதிகள், கட்டிடங்கள் அல்லது நகரப் பகுதிகள் தற்காலிகமாக மூடப்பட வேண்டிய நிலை ஏற்படலாம். மாசுபாட்டின் அளவை மதிப்பிட்டு, பாதிக்கப்பட்ட இடங்களைச் சுத்திகரிப்பதற்கும் பாதுகாப்பான பயன்பாட்டுக்குக் கொண்டுவருவதற்கும் அதிகாரிகள் நடவடிக்கை எடுக்க வேண்டியிருக்கும்.

இதற்கு முன்னர் பயன்படுத்தப்பட்டுள்ளதா?

இதுவரை உறுதிப்படுத்தப்பட்ட அசுத்த வெடிகுண்டு வெடிப்புச் சம்பவம் எதுவும் பதிவாகவில்லை. எனினும், இதுபோன்ற ஆயுதங்களைப் பயன்படுத்துவதற்கான முயற்சிகளும் அச்சுறுத்தல்களும் கடந்த காலங்களில் இடம்பெற்றுள்ளன.

1995ஆம் ஆண்டு செச்சென் கிளர்ச்சியாளர்கள் மாஸ்கோவிலுள்ள பூங்கா ஒன்றில் கதிரியக்கப் பொருட்கள் அடங்கிய கொள்கலன் ஒன்றை மறைத்து வைத்திருந்தனர். இதுகுறித்து தொலைக்காட்சி நிலையமொன்றுக்குத் தகவல் வழங்கப்பட்டதைத் தொடர்ந்து அதிகாரிகள் அதனைக் கண்டுபிடித்தனர். அந்தச் சம்பவத்தில் வெடிப்பு எதுவும் இடம்பெறவில்லை.

1998ஆம் ஆண்டு செச்சினியாவில் ரயில் பாதைக்கு அருகில் கதிரியக்கப் பொருட்களுடன் தொடர்புடைய மற்றொரு வெடிகுண்டுச் சாதனம் கண்டுபிடிக்கப்பட்டு செயலிழக்கச் செய்யப்பட்டது.

அல்கொய்தா உள்ளிட்ட பயங்கரவாத அமைப்புகளும் இத்தகைய ஆயுதங்கள் தொடர்பில் ஆராய்ந்துள்ளதாக மேற்கத்திய பாதுகாப்பு அமைப்புகள் தெரிவித்துள்ளன. இருப்பினும், அவற்றின் நடைமுறைப் பயன்பாடு இதுவரை உறுதிப்படுத்தப்படவில்லை.

கதிரியக்கத் தாக்குதல் ஏற்பட்டால் எவ்வாறு பாதுகாப்பது?

கதிரியக்கச் சம்பவம் ஒன்று இடம்பெற்றால், உடனடியாகப் பாதுகாப்பான கட்டிடத்திற்குள் சென்று தங்கியிருப்பதும், அதிகாரிகளின் அறிவுறுத்தல்களைப் பின்பற்றுவதும் முக்கியமானதாகும் என அமெரிக்க நோய்க் கட்டுப்பாடு மற்றும் தடுப்பு மையம் (CDC) அறிவுறுத்துகிறது.

வெடிப்புச் சம்பவத்திற்கு அருகில் இருப்பவர்கள் கதிரியக்கத் தூசியைச் சுவாசிப்பதைத் தவிர்த்து, சேதமடையாத கட்டிடத்திற்குள் விரைவாகச் செல்ல வேண்டும்.

கட்டிடத்திற்குள் சென்ற பின்னர் ஜன்னல்கள் மற்றும் வெளிப்புறக் கதவுகளை மூடுவதுடன், வெளிக்காற்றை உள்ளிழுக்கும் காற்றோட்ட அமைப்புகளையும் பாதுகாப்பு அதிகாரிகளின் அறிவுறுத்தலின்படி நிறுத்த வேண்டும்.

கதிரியக்கத் தூசி படிந்திருக்கலாம் எனச் சந்தேகிக்கப்படும் நபர்கள் தமது வெளிப்புற ஆடைகளை கவனமாக அகற்றி, அவற்றை மற்றவர்களிடமிருந்து தனியாக வைக்க வேண்டும். பின்னர் சோப்பு மற்றும் தண்ணீரைப் பயன்படுத்தி உடலைக் கழுவ வேண்டும். வெளிப்புற ஆடைகளை அகற்றுவதன் மூலம் கதிரியக்க மாசுபாட்டில் 90 சதவீதம் வரை நீக்கப்படலாம் என CDC குறிப்பிடுகிறது.

மேலும், மருத்துவ அல்லது சுகாதார அதிகாரிகளின் ஆலோசனையின்றி அயோடின் மாத்திரைகளை உட்கொள்ளக் கூடாது. பொட்டாசியம் அயோடைடு மாத்திரைகள் கதிரியக்க அயோடினால் தைராய்டு சுரப்பி பாதிக்கப்படுவதை மட்டுமே தடுக்கும். அவை அனைத்து வகையான கதிர்வீச்சுகளிலிருந்தும் பாதுகாப்பை வழங்குவதில்லை.

அமெரிக்க உளவுத்துறையின் புதிய தகவல்கள் உண்மையான தாக்குதல் திட்டத்தை உறுதிப்படுத்துகின்றனவா என்பது இன்னும் தெளிவாகாத நிலையில், இந்த விவகாரம் அமெரிக்காவின் தேசியப் பாதுகாப்பு மற்றும் ஈரானுடனான உறவுகள் தொடர்பான கவனத்தை மீண்டும் அதிகரித்துள்ளது.

No comments