ஃபேஸ்புக் பயனர்களை ஏமாற்றியதாகத் தீர்ப்பு: மெட்டாவுக்கு 25 பில்லியன் டாலர் அபராதம்

பயனர்களின் தனியுரிமை மற்றும் உள்ளடக்கக் கட்டுப்பாடு தொடர்பாக ஃபேஸ்புக் தவறான தகவல்களை வழங்கியதாகக் கண்டறியப்பட்டதைத் தொடர்ந்து, அதன் தாய் நிறுவனமான மெட்டா, அமெரிக்காவின் நியூ மெக்சிகோ மாநிலத்திற்கு 25 பில்லியன் டாலர் அபராதம் செலுத்த வேண்டும் என நீதிமன்றம் உத்தரவிட்டுள்ளது.

நேற்றுப் புதன்கிழமை வெளியான தீர்ப்பில், பயனர்களின் தனிப்பட்ட தரவுகள் அவர்களது கட்டுப்பாட்டில் இருப்பதாக ஃபேஸ்புக் உறுதியளித்த போதிலும், அந்த வாக்குறுதி உண்மைக்கு மாறானது என நீதிபதி பிரான்சிஸ் மேத்யூ குறிப்பிட்டுள்ளார்.

இந்த வழக்கு, 2016ஆம் ஆண்டு வெளிச்சத்துக்கு வந்த கேம்பிரிட்ஜ் அனலிடிகா தரவு முறைகேட்டுடன் தொடர்புடையது. அப்போது, மூன்றாம் தரப்பு வினாடி வினா செயலி ஒன்றின் மூலம் சுமார் 87 மில்லியன் ஃபேஸ்புக் பயனர்களின் தரவுகள் சேகரிக்கப்பட்டு, பிரிட்டனைச் சேர்ந்த அரசியல் ஆலோசனை நிறுவனத்திடம் வழங்கப்பட்டன. இந்தத் தரவுகள் இலக்கு வைக்கப்பட்ட அரசியல் விளம்பரங்களுக்குப் பயன்படுத்தப்பட்டதாகக் குற்றச்சாட்டுகள் எழுந்தன. டொனால்ட் டிரம்பின் முதலாவது ஜனாதிபதித் தேர்தல் பிரசாரமும் இதில் குறிப்பிடப்பட்டுள்ளது.

மெட்டாவுடனான சமரசத்தை நிராகரித்த நியூ மெக்சிகோ

அமெரிக்காவின் பல மாநிலங்கள், ஃபேஸ்புக்குக்கு எதிரான பல்வேறு சட்டப் பிரச்சினைகள் தொடர்பாக மொத்தம் 18 பில்லியன் டாலர் மதிப்பிலான சமரசத் திட்டத்தை ஏற்றுக்கொண்டதாகத் தெரிவிக்கப்படுகிறது. ஆனால், நியூ மெக்சிகோ அந்தச் சமரசத்தில் இணையாமல், நிறுவனத்துக்கு எதிராகத் தனியாக வழக்குத் தொடர்ந்தது.

ஃபேஸ்புக்கின் தனியுரிமை தொடர்பான பொது வாக்குறுதிகள் மாநில மக்களைத் தவறாக வழிநடத்தியதாகவும், தவறான தகவல்கள் மற்றும் வன்முறையைத் தூண்டும் உள்ளடக்கங்கள் பரவுவதைத் தடுக்க நிறுவனம் போதுமான நடவடிக்கைகளை எடுக்கவில்லை என்றும் மாநில அரசுத் தரப்பு குற்றஞ்சாட்டியது.

இதற்கு எதிராக, தங்களது தளத்தில் வலுவான உள்ளடக்கக் கட்டுப்பாட்டு நடைமுறைகள் இருப்பதாகவும், நிறுவனத்தின் அறிக்கைகளால் நுகர்வோர் உண்மையில் பாதிக்கப்பட்டனர் என்பதை அரசுத் தரப்பு நிரூபிக்கவில்லை என்றும் மெட்டாவின் வழக்கறிஞர்கள் வாதிட்டனர்.

எனினும், செப்டம்பரில் நடைபெற்ற விசாரணையில், நியூ மெக்சிகோவின் நுகர்வோர் பாதுகாப்புச் சட்டங்களை 43 மில்லியனுக்கும் அதிகமான தடவைகள் மீறியதற்காக ஃபேஸ்புக் பொறுப்பேற்க வேண்டும் என நடுவர் குழு தீர்மானித்தது. இதனை எதிர்த்து மேலதிக சட்ட நடவடிக்கைகளை முன்னெடுக்கப் போவதாக மெட்டா தெரிவித்துள்ளது.

மெட்டாவிடமிருந்து 35 பில்லியன் முதல் 40 பில்லியன் டாலர் வரை இழப்பீடு கோரியிருந்த நியூ மெக்சிகோ அரசுத் தரப்புக்கு, தற்போது அறிவிக்கப்பட்ட 25 பில்லியன் டாலர் தொகை அதைவிடக் குறைவாகும். அதேவேளை, மெட்டா தரப்பு முன்வைத்த 3.45 பில்லியன் டாலர் உச்சவரம்பை விட இது கணிசமாக அதிகமாகும்.

நியூ மெக்சிகோ தலைமை வழக்கறிஞர் ரவுல் டோரெஸ், இந்தத் தீர்ப்பு சிலிக்கான் பள்ளத்தாக்கிலுள்ள தொழில்நுட்ப நிறுவனங்களுக்கு வலுவான செய்தியை வழங்க வேண்டும் எனக் கூறியுள்ளார்.

மேல்முறையீடுகள் காரணமாக அபராதத் தொகையைப் பெறுவதில் தாமதம் ஏற்படலாம் என்றும் அவர் தெரிவித்துள்ளார். சட்ட நடைமுறைகளின்படி, அபராதத் தொகை மாநிலத்தின் கல்வி நிதிக்கு ஒதுக்கப்பட வேண்டியிருப்பதால், அது கிடைத்தால் பள்ளிக் கட்டடங்கள் மற்றும் கல்வி உட்கட்டமைப்புகளை மேம்படுத்துவதற்குப் பயன்படுத்தப்படலாம் என எதிர்பார்க்கப்படுகிறது.

இதற்கிடையில், குழந்தைகளுக்குப் பாதிப்பை ஏற்படுத்தியதாகக் கூறப்படும் விவகாரம் தொடர்பாக, நியூ மெக்சிகோவில் மெட்டாவுக்கு எதிராக ஆகஸ்ட் மாதம் 567 மில்லியன் டாலர் செலுத்த உத்தரவிடப்பட்ட தனித் தீர்ப்பும் வெளியாகியிருந்தது.

தனியுரிமை, குழந்தைகளின் பாதுகாப்பு மற்றும் இணைய உள்ளடக்கங்களைக் கட்டுப்படுத்துதல் தொடர்பாகப் பெரிய சமூக ஊடக நிறுவனங்கள் பல்வேறு நாடுகளில் சட்ட நடவடிக்கைகளை எதிர்கொண்டு வரும் நிலையில், நியூ மெக்சிகோ நீதிமன்றத்தின் இந்தத் தீர்ப்பு தொழில்நுட்பத் துறையின் பொறுப்புடைமை குறித்த விவாதத்தை மீண்டும் தீவிரப்படுத்தியுள்ளது.