டிரம்ப் - புடின் தொலைபேசி உரையாடல்: இருதரப்பும் என்ன கூறுகின்றனர்?

போரை முடிவுக்குக் கொண்டுவர ரஷ்யாவிற்கும் உக்ரைனுக்கும் இடையிலான பேச்சுவார்த்தைகள் உடனடியாக தொடங்கும் என்று அமெரிக்க அதிபர் டொனால்ட் டிரம்ப் கூறுகிறார்.

ரஷ்ய அதிபர் விளாடிமிர் புதினுடனான தனது அழைப்பு மிகவும் சிறப்பாக நடந்ததாக டிரம்ப் தனது ட்ரூத் சோஷியலில் ஒரு பதிவில் தெரிவித்தார்.

ரஷ்யாவும் உக்ரைனும் உடனடியாக போர் நிறுத்தம் மற்றும் மிக முக்கியமாக, போரை முடிவுக்குக் கொண்டுவருவதற்கான பேச்சுவார்த்தைகளைத் தொடங்கும் என்று அவர் எழுதினார்.

புடினுடனான தொலைபேசி அழைப்பிற்குப் பின்னர் உக்ரைன் ஜனாதிபதி வோலோடிமிர் ஜெலென்ஸ்கி மற்றும் ஐரோப்பிய தலைவர்களுடனும் பேசியதாக அவர் கூறினார்.

இந்த அழைப்பு குறித்து ஐரோப்பிய ஆணையத் தலைவர் உர்சுலா வான் டெர் லேயன், ஜெர்மன் அதிபர் பிரீட்ரிக் மெர்ஸ், பிரெஞ்சு அதிபர் இம்மானுவேல் மக்ரோன், இத்தாலிய பிரதமர் ஜியோர்ஜியா மெலோனி மற்றும் பின்லாந்து அதிபர் அலெக்சாண்டர் ஸ்டப் ஆகியோரிடமும் டிரம்ப் பேசினார். 

உக்ரைன்-ரஷ்யா பேச்சுவார்த்தைகளை நடத்த வத்திக்கான் முன்வந்ததாக டிரம்ப் மேலும் கூறினார். 

ரஷ்ய அதிபர் விளாடிமிர் புடின், அமெரிக்க அதிபர் டொனால்ட் டிரம்புடனான தொலைபேசி அழைப்பு குறித்து செய்தியாளர்களிடம் தெரிவித்தார்.

டிரம்புடனான உரையாடலை வெளிப்படையானது மற்றும் அர்த்தமுள்ளதாக புடின் விவரித்தார். 

இது மிகவும் தகவலறிந்ததாகவும், மிகவும் வெளிப்படையாகவும், ஒட்டுமொத்தமாக என் கருத்துப்படி, மிகவும் பயனுள்ளதாகவும் இருந்தது என செய்தியாளர்களிடம் தெரிவித்தார்.

இந்த தொலைபேசி உரையாடல் இரண்டு மணி நேரத்திற்கும் மேலாக நீடித்தது என்று கூறினார்.

உக்ரைனில் நடந்த போருக்கு அமைதியான தீர்வு காண ரஷ்யா ஆதரவளிப்பதாக அவர் கூறினார். 

இரு தரப்பினருக்கும் ஏற்றவாறு சமரசங்கள் காணப்பட வேண்டும் என்று புடின் கூறினார். 

எதிர்கால அமைதி ஒப்பந்தம் குறித்த ஒரு குறிப்பாணையில் ரஷ்யா முன்மொழியும் என்று அமெரிக்க ஜனாதிபதியுடன் நாங்கள் உடன்பட்டுள்ளோம். மேலும் உக்ரைன் தரப்புடன் இணைந்து பணியாற்றத் தயாராக உள்ளோம், எடுத்துக்காட்டாக, தீர்வுக்கான கொள்கைகள், சாத்தியமான அமைதி ஒப்பந்தத்தின் நேரம் போன்ற பல நிலைப்பாடுகளை வரையறுக்கிறோம் என்று புடின் சோச்சியின் கருங்கடல் ரிசார்ட்டுக்கு அருகில் செய்தியாளர்களிடம் கூறினார்.