ஐரோப்பாவிலுள்ள அமெரிக்க இராணுவத் தளங்களையும் தாக்கும் திறன் ஈரானுக்கு உண்டு – ஐ.ஆர்.ஜி.சி எச்சரிக்கை


ஈரானின் உச்ச தலைவர் அயதுல்லா சையத் மொஜ்தபா ஹொசைனி கமேனி உத்தரவிட்டால், ஐரோப்பாவில் அமைந்துள்ள அமெரிக்க இராணுவத் தளங்கள் உட்பட உலகின் எந்தப் பகுதியிலும் பதிலடித் தாக்குதல்களை நடத்தும் திறன் தமது நாட்டுக்கு இருப்பதாக ஈரானின் இஸ்லாமியப் புரட்சிக் காவலர் படை (IRGC) தெரிவித்துள்ளது.

வியாழக்கிழமை செய்தியாளர்களிடம் கருத்துத் தெரிவித்த ஐ.ஆர்.ஜி.சி செய்தித் தொடர்பாளர் பிரிகேடியர் ஜெனரல் ஹொசைன் மொஹெப்பி, உச்ச தலைவரின் உத்தரவு கிடைத்தால் புவியியல் எல்லைகளைக் கடந்து இராணுவ நடவடிக்கைகளை முன்னெடுக்கும் அளவுக்கு ஈரானின் ஏவுகணைத் திறன் வளர்ச்சியடைந்துள்ளதாகக் குறிப்பிட்டார்.

முன்னாள் உச்ச தலைவர் அயதுல்லா சையத் அலி கமேனியின் உத்தரவின்படி, ஈரான் தனது ஏவுகணைகளின் தாக்குதல் வரம்பை 2,000 கிலோமீட்டருக்குள் கட்டுப்படுத்தி வந்ததாகவும் அவர் தெரிவித்தார்.

எனினும், தற்போது 4,500 கிலோமீட்டர் வரையிலான தாக்குதல் திறனைக் கொண்ட ஏவுகணைகளை ஈரான் வெளிப்படுத்தியுள்ளதாகவும், இதன் மூலம் இந்தியப் பெருங்கடலில் அமைந்துள்ள டியாகோ கார்சியா தீவும் ஈரானின் சாத்தியமான தாக்குதல் எல்லைக்குள் வருவதாகவும் அவர் கூறினார்.

அத்துடன், அமெரிக்கா ஈரானின் அணைகள் மீது தாக்குதல் நடத்தினால் அதற்குத் தகுந்த பதிலடி வழங்கப்படும் என்றும் அவர் எச்சரித்தார்.

மேலும், வேறொரு நாட்டின் நிலப்பரப்பைப் பயன்படுத்தி அமெரிக்கா ஈரானுக்கு எதிராக இராணுவ நடவடிக்கை மேற்கொண்டதாகத் தெஹ்ரான் கருதினால், அந்த நாடும் ஈரானின் பதிலடித் தாக்குதலுக்கு இலக்காகலாம் என அவர் தெரிவித்தார்.

தெஹ்ரானுக்கும் வாஷிங்டனுக்கும் இடையிலான பதற்றம் அதிகரித்து வரும் சூழலில் இந்த அறிவிப்பு வெளியாகியுள்ளது. இரு நாடுகளுக்கும் இடையே மீண்டும் இராணுவ மோதல் ஏற்பட்டால், அதன் தாக்கம் மத்திய கிழக்குப் பிராந்தியத்தைத் தாண்டியும் விரிவடையக்கூடும் என்ற அச்சம் உருவாகியுள்ளது.

No comments