ஷென்செனில் ஒரே சிவப்புக் கம்பளத்தில் டிரம்ப், புதின், ஷி ஜின்பிங்! உலக நாடுகளின் கவனத்தை ஈர்த்த சந்திப்பு


சீனாவின் ஷென்சென் நகரில் இன்று நடைபெறவுள்ள பிரம்மாண்டமான இரவு விருந்துக்கு முன்னதாக, அமெரிக்க ஜனாதிபதி டொனால்ட் டிரம்ப், ரஷ்ய ஜனாதிபதி விளாடிமிர் புதின் மற்றும் சீன ஜனாதிபதி ஷி ஜின்பிங் ஆகிய மூன்று உலகத் தலைவர்களும் ஒரே இடத்தில் சந்தித்துக்கொண்ட காட்சிகள் வெளியாகி சர்வதேச அளவில் கவனத்தை ஈர்த்துள்ளன.

இந்தச் சந்திப்பு தொடர்பான காணொளியை ரஷ்யாவின் கிரெம்ளின் நிர்வாகம் தனது டெலிகிராம் சமூக வலைத்தளப் பக்கத்தில் வெளியிட்டுள்ளது.

அந்தக் காணொளியில், ஷி ஜின்பிங்கும் அவரது மனைவியும் டொனால்ட் டிரம்ப்பும் சிவப்புக் கம்பளத்தில் அருகருகே நின்றுகொண்டிருக்கின்றனர். அப்போது அங்கு வந்த விளாடிமிர் புதினை டிரம்ப் கைகுலுக்கி வரவேற்கிறார். தொடர்ந்து இருவரும் ஒருவரையொருவர் தோளில் தட்டிக்கொண்டு நட்புடன் வாழ்த்துகளைப் பரிமாறிக்கொள்கின்றனர்.

2025 ஆகஸ்ட் மாதம் அலாஸ்காவில் நடைபெற்ற அமெரிக்கா - ரஷ்ய உச்சி மாநாட்டிற்குப் பின்னர் டிரம்ப்பும் புதினும் நேரில் சந்தித்துக்கொள்ளவில்லை என்பது குறிப்பிடத்தக்கது.

மேலும், அமெரிக்கா, ரஷ்யா மற்றும் சீனா ஆகிய மூன்று வல்லரசு நாடுகளின் தலைவர்களும் ஒரே நேரத்தில் இவ்வாறு ஒன்றாகக் காட்சியளிப்பது இதுவே முதல் முறையாகும். இதனால் இச்சந்திப்பு சர்வதேச அரசியல் வட்டாரங்களில் முக்கியத்துவம் பெற்றுள்ளது.

ஆசிய-பசிபிக் பொருளாதார ஒத்துழைப்பு (APEC) மாநாட்டின் பின்னணியில் நடைபெறும் இந்தச் சந்திப்பைத் தொடர்ந்து, நாளை (நவம்பர் 19) பிற்பகல் மூன்று தலைவர்களும் முத்தரப்புப் பேச்சுவார்த்தையில் ஈடுபடவுள்ளனர்.

அணு ஆயுதக் கட்டுப்பாடு, சர்வதேச பாதுகாப்பு, ஈரான் விவகாரம் உள்ளிட்ட முக்கியமான உலகளாவிய பிரச்சினைகள் குறித்து அவர்கள் கலந்துரையாடுவார்கள் என எதிர்பார்க்கப்படுகிறது. இந்தச் சந்திப்பின் முடிவுகள் உலக அரசியல் மற்றும் வல்லரசு நாடுகளுக்கு இடையிலான உறவுகளில் எத்தகைய தாக்கத்தை ஏற்படுத்தும் என்ற எதிர்பார்ப்பு உருவாகியுள்ளது.

No comments