இருபது ஆண்டுளின் பின்னர் சோமாலியாவிலிருந்து உகாண்டா படைகள் பின்வாங்கத் தொடங்கின

சுமார் இரண்டு தசாப்தங்களாக சோமாலியாவில் கிளர்ச்சியாளர்களுக்கு எதிரான போராட்டத்திலும், அந்நாட்டின் பாதுகாப்பு மற்றும் நிலைப்படுத்தல் நடவடிக்கைகளிலும் முக்கியப் பங்காற்றி வந்த உகாண்டா, அங்கிருந்து தனது படைகளைத் திரும்பப் பெறும் நடவடிக்கையைத் தொடங்கியுள்ளது.

உகாண்டா இராணுவம் திங்களன்று வெளியிட்ட அறிக்கையில், கட்டம் கட்டமாக முன்னெடுக்கப்படும் படை விலகல் நடவடிக்கையின் முதலாவது குழுவினர் ஏற்கனவே நாடு திரும்பியுள்ளதாகத் தெரிவித்துள்ளது.

அல்-ஷபாப் இஸ்லாமிய ஆயுதக் குழுவுக்கு எதிராகப் போராடி வரும் சோமாலிய அரசாங்கத்துக்கு ஆதரவளிக்கும் நோக்கில், 2007ஆம் ஆண்டு ஆப்பிரிக்க ஒன்றியத்தின் அமைதிப்படை நடவடிக்கையில் இணைந்த முதல் நாடாக உகாண்டா விளங்கியது.

தற்போது ஆப்பிரிக்க ஒன்றியத்தின் ஆதரவு மற்றும் நிலைப்படுத்தல் திட்டமான AUSSOM இன் கீழ் சோமாலியாவில் சுமார் 4,500 உகாண்டா படையினர் பணியாற்றி வருகின்றனர். மேலும், இருதரப்பு பாதுகாப்பு ஒப்பந்தங்களின் கீழ் சுமார் 2,000 படையினரும் அங்கு நிலைநிறுத்தப்பட்டுள்ளனர்.

இந்த நிலையில், AUSSOM படையினர் உட்பட சோமாலியாவில் நிலைநிறுத்தப்பட்டுள்ள தனது அனைத்துப் படைகளையும் 2027ஆம் ஆண்டின் இறுதிக்குள் படிப்படியாகத் திரும்பப் பெற உகாண்டா தீர்மானித்துள்ளது.

இந்த முடிவு சோமாலியாவின் பாதுகாப்புப் பொறுப்பை அந்நாட்டின் சொந்த ஆயுதப் படைகளிடம் முழுமையாக ஒப்படைக்கும் நோக்கத்தைக் கொண்டுள்ளதாக உகாண்டா இராணுவம் தெரிவித்துள்ளது.

உகாண்டாவின் இந்தப் படை விலகல், சோமாலியாவின் பாதுகாப்பு நிலைமைக்கும் அல்-ஷபாப் ஆயுதக் குழுவுக்கு எதிரான நடவடிக்கைகளுக்கும் எத்தகைய தாக்கத்தை ஏற்படுத்தும் என்பது சர்வதேச அரசியல் மற்றும் பாதுகாப்பு வட்டாரங்களில் கவனத்தை ஈர்த்துள்ளது.

சுமார் 20 ஆண்டுகளாக சோமாலியாவின் பாதுகாப்பு நடவடிக்கைகளில் பங்காற்றிய உகாண்டாவின் இந்தத் தீர்மானம், அந்நாட்டின் எதிர்காலப் பாதுகாப்பு ஏற்பாடுகளில் ஒரு முக்கியமான திருப்புமுனையாகக் கருதப்படுகிறது.