இங்கிலாந்து உங்களுடன் நிற்கிறது: இஸ்ரேலில் ரிஷி சுனக்

இங்கிலாந்து உங்களுடன் நிற்கிறது என்று பிரித்தானியப் பிரதமர் ரிஷி சுனக் கூறியுள்ளார். இன்று வியாழக்கிழமை இஸ்ரேல் சென்ற அவர் டெல் அவிவ் விமான நிலையத்தில் வைத்து செய்தியாளர்கிளிடம் கருத்துரைக்கும் போதே அவர் இதனைத் தெரிவித்தார்.

கடந்த அக்டோபர் 7 ஆம் நாள் ஹமாஸ் நடத்திய தாக்குதல் சொல்ல முடியாத, பயங்கரமான பயங்கரவாத செயல் என்று கூறினார்.

இங்கிலாந்து இஸ்ரேலுடன் நிற்கிறது என்று மீண்டும் வலியுறுத்தினார்.

இஸ்ரேல் பிரதமர் மற்றும் ஜனாதிபதியுடனான எனது சந்திப்புகளை நான் மிகவும் ஆவலுடன் எதிர்பார்க்கிறேன். அவை பயனுள்ள சந்திப்புகளாக இருக்கும் என்று நான் மிகவும் நம்புகிறேன் என்று சுனக் கூறினார்.

அவர் நேற்றிரவு சைப்ரஸ் சென்ற சுனக் பின்னர் இன்று காலை டெல் அவிவ் சென்றார்.

அடுத்த சில மணிநேரங்களில் இஸ்ரேலிய பிரதமர் பெஞ்சமின் நெதன்யாகு மற்றும் இஸ்ரேலிய ஜனாதிபதி ஐசக் ஹெர்சாக் ஆகியோரை சந்திக்க சுனக் ஜெருசலேம் செல்கிறார்.