சவூதி அரேபியா முழுவதும் ஹூதிகள் புதிய ஏவுகணைத் தாக்குதல்கள்

ஏமனில் இருந்து ஏவப்பட்ட பாலிஸ்டிக் ஏவுகணையை இடைமறித்ததாக சவூதி அரேபிய அதிகாரிகள் தெரிவித்துள்ள நிலையில், தலைநகர் ரியாத்தில் சக்திவாய்ந்த வெடிச்சத்தம் கேட்டதாகப் பொதுமக்கள் தெரிவித்துள்ளனர். இதற்கிடையில், சவூதி அரசின் எண்ணெய் நிறுவனமான அராம்கோவின் தஹ்ரான் வளாகத்தில் ஏற்பட்ட தீ விபத்து தொடர்பாகவும் தகவல்கள் வெளியாகியுள்ளன.

ரியாத்தை நோக்கி ஏவப்பட்ட ஏவுகணைகள் உள்ளிட்ட பல ஏவுகணைகளை இடைமறித்ததாகச் சவூதி அதிகாரிகள் தெரிவித்தனர். ஏவுகணைகள் இடைமறிக்கப்பட்டதைத் தொடர்ந்து விழுந்த சிதறல்கள் காரணமாக நான்கு பேர் காயமடைந்ததாகவும் அதிகாரிகள் குறிப்பிட்டனர்.

சவூதி குடிமைப் பாதுகாப்பு அமைப்பின் தகவலின்படி, ரியாத்தில் இரண்டு பெண்கள், ஓர் ஆண் மற்றும் ஒரு குழந்தை காயமடைந்துள்ளனர். மேலும், 15 வீடுகள் சேதமடைந்துள்ளன. தலைநகரில் வெடிச்சத்தம் கேட்டதைத் தொடர்ந்து, பொதுமக்களின் கைப்பேசிகளுக்கு வான்வழி அச்சுறுத்தல் தொடர்பான எச்சரிக்கைகள் அனுப்பப்பட்டன.

இதற்கிடையில், ரியாத் விமான நிலையம் மற்றும் அராம்கோ எண்ணெய் சுத்திகரிப்பு நிலையம் மீது மீண்டும் தாக்குதல் நடத்தியதாக ஹூதிகள் தெரிவித்துள்ளனர். எனினும், இந்தத் தாக்குதல்கள் தொடர்பான தகவல்களைச் சவூதி அதிகாரிகள் உறுதிப்படுத்தவில்லை.

சவூதி அரேபியாவின் கிழக்குப் பகுதியில் அமைந்துள்ள தஹ்ரானில் உள்ள அராம்கோ நிறுவன வளாகத்தில் ஏற்பட்ட தீ விபத்தில் உயிரிழப்புகள் எதுவும் ஏற்படவில்லை என அந்நாட்டின் எரிசக்தி அமைச்சகம் தெரிவித்துள்ளது. இந்தச் சம்பவத்தால் சிறிய அளவிலான தீ ஏற்பட்டதாகவும் கூறப்பட்டுள்ளது.

அராம்கோ வளாகத்தில் உள்ள அலுவலகக் கட்டிடத்தின் மேல் தளங்களைப் பாலிஸ்டிக் ஏவுகணை தாக்கியதாக நிறுவன வட்டாரம் ஒன்று ராய்ட்டர்ஸ் செய்தி நிறுவனத்திடம் தெரிவித்துள்ளது. உலகின் மிகப்பெரிய எண்ணெய் நிறுவனங்களில் ஒன்றான அராம்கோவின் முக்கியச் செயல்பாட்டுத் தளமாக இந்த வளாகம் விளங்குகிறது.

மறுபுறம், ஹூதிகளுக்கு எதிராகப் போரிட்டு வரும் சவூதி தலைமையிலான கூட்டணி, யேமன் தலைநகர் சனாவில் உள்ள இலக்குகள் மீது செவ்வாய்க்கிழமை தாக்குதல் நடத்தியதாக ஹூதிகளின் கட்டுப்பாட்டில் இயங்கும் அல் மசிரா ஊடகம் தெரிவித்துள்ளது.

இந்தத் தாக்குதலுக்கு முன்னதாக, யேமன் எண்ணெய் நிறுவனத்துக்குச் சொந்தமான சுஹாபா எரிபொருள் நிலையம் மற்றும் அதன் அருகிலுள்ள பகுதியிலிருந்து வெளியேறுமாறு கூட்டணியின் செய்தித் தொடர்பாளர் எச்சரிக்கை விடுத்ததாகக் கூறப்படுகிறது. அதனைத் தொடர்ந்து சனாவில் பலத்த வெடிச்சத்தங்கள் கேட்டதாக உள்ளூர்வாசிகள் தெரிவித்தனர்.

சவூதி மண்ணில் தாக்குதல்கள் அதிகரிப்பது, ஹூதிகளுக்கு எதிரான நடவடிக்கைகளில் அமெரிக்கா உள்ளிட்ட சவூதியின் நட்பு நாடுகள் நேரடியாகப் பங்கேற்க வேண்டுமா என்ற விவாதத்தைத் தீவிரப்படுத்தியுள்ளது.

ஈரான் மற்றும் அமெரிக்கா இடையிலான மோதலால் ஏற்கெனவே எரிசக்திச் சந்தைகள் பாதிக்கப்பட்டுள்ள நிலையில், சவூதி அரேபியா மற்றும் ஹூதிகளுக்கு இடையிலான பதற்றம் அதிகரிப்பது உலகளாவிய எண்ணெய் விநியோகம், எரிசக்தி விலைகள் மற்றும் பொருளாதார வளர்ச்சியில் கூடுதல் தாக்கங்களை ஏற்படுத்தக்கூடும் என்ற அச்சம் எழுந்துள்ளது.