பிரான்சின் முக்கிய நகரங்களில் ஊரடங்கு: கலவரங்களைக் கட்டுப்படுத்த அதிகாரிகள் நடவடிக்கை

வாழ்க்கைச் செலவு அதிகரிப்பு மற்றும் அரசாங்கத்திற்கு எதிரான போராட்டங்கள் வன்முறையாக மாறியதைத் தொடர்ந்து, பிரான்சின் பாரிஸ், லில்லி, நைஸ் உள்ளிட்ட நகரங்களின் சில பகுதிகளில் அதிகாரிகள் ஊரடங்கு உத்தரவுகளைப் பிறப்பித்துள்ளனர்.

வார இறுதியில் இடம்பெற்ற கலவரங்கள், கொள்ளைச் சம்பவங்கள் மற்றும் பாதுகாப்புக் குறைபாடுகள் தொடர்பாக எழுந்த விமர்சனங்களைத் தொடர்ந்து, திங்கள்கிழமை இரவு முதல் பல்வேறு கட்டுப்பாட்டு நடவடிக்கைகள் அறிவிக்கப்பட்டன.

தலைநகர் பாரிஸில், பிளேஸ் டி லா ரிபப்ளிக் மற்றும் லெ ஹால்ஸ் பகுதிகளைச் சுற்றியுள்ள இடங்களில் இரவு 11 மணி முதல் மறுநாள் காலை 6 மணி வரை ஊரடங்கு அமல்படுத்தப்பட்டது. இதேவேளை, நகரின் வேறு சில பகுதிகளில் இரவு 8 மணி முதல் போராட்டங்களுக்குத் தடை விதிக்கப்பட்டது.

அவசரநிலையைப் பிரகடனப்படுத்துவதும் அரசாங்கத்தின் பரிசீலனையில் உள்ள ஒரு நடவடிக்கையாகும். இருப்பினும், தற்போதைய சூழ்நிலையைக் கட்டுப்படுத்த ஊரடங்கு உத்தரவுகளை அமல்படுத்துவதே பொருத்தமானது என லெகோர்னு தெரிவித்தார். அவசியம் ஏற்பட்டால் அவசரநிலையைப் பிரகடனப்படுத்த முடியும் என்றும் அவர் குறிப்பிட்டார்.

பிரான்சின் இரண்டாவது பெரிய நகரமான மார்சேயில், திங்கள்கிழமை நண்பகல் 12 மணி முதல் இரவு 8 மணி வரை ஆர்ப்பாட்டங்களுக்கும் பொதுக்கூட்டங்களுக்கும் அதிகாரிகள் தடை விதித்தனர்.

வார இறுதியில் இடம்பெற்ற வன்முறைச் சம்பவங்களின்போது, 30,000-க்கும் மேற்பட்டோர் கொள்ளைச் சம்பவங்களில் ஈடுபட்டதாகவும், அவர்களில் 8,000 பேர் கலவரக்காரர்கள் என அடையாளம் காணப்பட்டதாகவும் நகரக் காவல்துறை தெரிவித்துள்ளது.

மார்சே நகரில், சிலர் நகர மன்றமான ஹோட்டல் டி வில்லுக்குள் வலுக்கட்டாயமாக நுழைந்ததுடன், மத்திய நகராட்சி காவல் நிலையத்தையும் தாக்கியுள்ளனர். நகர மையத்தில் 500-க்கும் மேற்பட்ட கடைகள் சேதப்படுத்தப்பட்டதாகவும், அவற்றில் பெரும்பாலானவை கொள்ளையிடப்பட்டதாகவும் நகர வர்த்தக சபை மதிப்பிட்டுள்ளது.

இதற்கிடையில், சனிக்கிழமை போராட்டங்களின்போது திருடப்பட்ட பொருட்கள் சில இணையவழி மறுவிற்பனைத் தளங்களில் விற்பனைக்கு வைக்கப்பட்டுள்ளதாகத் தகவல்கள் வெளியாகியுள்ளன. இதனையடுத்து, உள்துறை மற்றும் நீதித்துறை அதிகாரிகளுடனும் இணையவழி விற்பனை நிறுவனங்களுடனும் கலந்துரையாடல் நடத்தப்படும் என வர்த்தக அமைச்சர் செர்ஜ் பாபின் திங்களன்று சமூக ஊடகமான  எக்ஸ் தளத்தில் அறிவித்தார்.

திருடப்பட்ட பொருட்கள் தொடர்பான விளம்பரங்களை உடனடியாக நீக்க வேண்டும் என விற்பனைத் தளங்களிடம் எதிர்பார்ப்பதாகத் தெரிவித்த அவர், இத்தகைய சட்டவிரோதச் செயல்களில் ஈடுபடுவோர் தண்டனையிலிருந்து தப்ப முடியாது என்றும் குறிப்பிட்டார்.

கலவரங்களைக் கட்டுப்படுத்துவதற்காகப் பாதுகாப்பு நடவடிக்கைகள் தீவிரப்படுத்தப்பட்டுள்ள நிலையில், பொதுமக்களின் பாதுகாப்பை உறுதிப்படுத்துவதுடன், வன்முறைக்குப் பின்னணியில் உள்ள சமூக மற்றும் பொருளாதாரக் காரணங்களுக்குத் தீர்வு காண வேண்டிய தேவையும் பிரெஞ்சு அரசாங்கத்தின் முன் எழுந்துள்ளது.