கிரீன்லாந்து விவகாரத்தில் அமெரிக்காவும் டென்மார்க்கும் உடன்பாடு எட்டின

கிரீன்லாந்தின் பாதுகாப்பின் மீது அமெரிக்காவிற்கு நிரந்தரக் கட்டுப்பாட்டை வழங்கும் ஒரு ஒப்பந்தத்தில், டென்மார்க் மற்றும் கிரீன்லாந்துடன்  அமெரிக்கா கையெழுத்திட்டுள்ளதாக அதிபர் டோனல்ட் டிரம்ப் வெள்ளிக்கிழமை அறிவித்தார்.

எனது வழிகாட்டுதலின் பேரில், கிரீன்லாந்து மற்றும் அமெரிக்காவின் பாதுகாப்பை உறுதி செய்வதற்கும் தற்காப்பதற்கும் தேவையானதைச் செய்வதற்கான முழுமையான திறனை அமெரிக்கா என்றென்றும் கொண்டிருக்கும் என்பதை உறுதி செய்வதற்காக, நாங்கள் டென்மார்க் மற்றும் கிரீன்லாந்து பிரதிநிதிகளுடன் இணைந்து பணியாற்றினோம், என்று டிரம்ப் ட்ரூத் சோஷியல் தளத்தில் கூறினார்.

இந்த ஒப்பந்தம், அமெரிக்காவின் எதிரி நாடுகள் அங்கு தளங்களை அமைப்பதைத் தடுக்கிறது என்று அமெரிக்க வெளியுறவுத் துறை தெரிவித்துள்ளது.

அமெரிக்கக் கண்டத்தைப் பாதுகாக்கவும் தற்காக்கவும் கிரீன்லாந்தில் நிரந்தர அணுகல், தளம் அமைத்தல் மற்றும் வான்வழிப் பயண உரிமைகள் உட்பட, அவசியமெனக் கருதும் அனைத்தையும் செய்வதற்கான முழுமையான திறனை இந்த ஒப்பந்தம் அமெரிக்காவிற்கு வெளிப்படையாக உத்தரவாதம் அளிக்கிறது," என்று அமெரிக்க வெளியுறவுத்துறை அதிகாரி ஒருவர் கூறினார். "சீனாவும் ரஷ்யாவும் கிரீன்லாந்தில் தளம் அமைக்க முடியாது, கிரீன்லாந்திற்குத் துருப்புகளை அனுப்ப முடியாது என்பதையும், முக்கியத்துவம் வாய்ந்த துறைகளில் முதலீடுகளைத் தடுப்பதற்கான தேவையான வழிமுறைகள் நடைமுறையில் உள்ளன என்பதையும் இந்த ஒப்பந்தம் உத்தரவாதம் அளிக்கிறது.

தனது பதிவில், டேனிஷ் பிரதேசத்தில் அமெரிக்கா உடனடியாக ஒரு பெரிய இராணுவ இருப்பை உருவாக்கத் தொடங்கும் என்று டிரம்ப் எழுதியுள்ளார்.

டேனிஷ் மற்றும் கிரீன்லாந்து அரசாங்கங்கள் வெளியிட்டுள்ள கூட்டறிக்கையின்படி, ஆர்க்டிக் தீவு தொடர்பான தங்களது சர்ச்சையில் ஒரு திருப்புமுனை ஏற்பட்டுள்ளதாக அமெரிக்கா, டென்மார்க் மற்றும் கிரீன்லாந்து அறிவித்துள்ளன.

கிரீன்லாந்து, டென்மார்க் இராச்சியம் மற்றும் அமெரிக்கா ஆகியவற்றுக்கு இடையே ஒரு நல்ல உடன்பாடு ஏற்பட வாய்ப்புள்ளது என்பதில் நான் மகிழ்ச்சியடைகிறேன் என்று டென்மார்க் பிரதமர் மெட்டே ஃபிரடெரிக்சன் ஓர் அறிக்கையில் தெரிவித்தார்.

இந்த ஒப்பந்தம் நேட்டோவிற்கும் ஐரோப்பாவிற்கும் சிறந்தது என்றும், (டென்மார்க்) இராச்சியத்தின் இறையாண்மை மற்றும் பிராந்திய ஒருமைப்பாட்டையும், கிரீன்லாந்து மக்களின் சுயநிர்ணய உரிமையையும் அங்கீகரிப்பதாகவும் அவர் மேலும் கூறினார்.