ஒடிசாவில் 5 குட்டி ஒராங்குட்டான்கள் மீட்பு: சர்வதேச கடத்தல் குறித்து விசாரணை

தென்கிழக்கு ஆசியாவில் இருந்து இந்தியாவுக்குள் கடத்தி வரப்பட்டிருக்கலாம் என சந்தேகிக்கப்படும் ஐந்து குட்டி ஒராங்குட்டான்களை ஒடிசா வனத்துறை அதிகாரிகள் மீட்டுள்ளனர். இச்சம்பவம் தொடர்பாக சர்வதேச அளவிலான வனவிலங்கு கடத்தல் கும்பல் குறித்து விசாரணை தொடங்கப்பட்டுள்ளது.

பாலசோர் மாவட்டத்தில் உள்ள காட்டுப்பகுதியில் இந்த ஐந்து ஒராங்குட்டான்களும் கண்டுபிடிக்கப்பட்டன. மரங்களில் தொங்கிய நிலையில் அவற்றைக் கண்ட கிராம மக்கள், முதலில் அவற்றை குரங்குகள் என நினைத்ததாகவும், பின்னர் அவற்றின் தோற்றம் வழக்கமான குரங்குகளைப் போல் இல்லை என்பதை உணர்ந்து வனத்துறை அதிகாரிகளுக்கு தகவல் தெரிவித்ததாகவும் கூறப்படுகிறது.

மூன்று ஆண் மற்றும் இரண்டு பெண் குட்டி ஒராங்குட்டான்கள் கால்நடை மருத்துவர்களால் பரிசோதிக்கப்பட்டதில், அவை நல்ல உடல்நலத்துடன் இருப்பது தெரியவந்தது. அவற்றுக்கு உணவு மற்றும் வாய்வழி நீரேற்றக் கரைசல் வழங்கப்பட்ட பின்னர், தனிமைப்படுத்தல் மற்றும் கண்காணிப்புக்காக புவனேஸ்வரில் உள்ள நந்தன் கனன் உயிரியல் பூங்காவுக்கு மாற்றப்பட்டன.

ஒராங்குட்டான்கள் இந்தியாவை பூர்வீகமாகக் கொண்டவை அல்ல என்பதால், அவை நாட்டிற்குள் எவ்வாறு கொண்டுவரப்பட்டன என்பது குறித்து வனவிலங்கு குற்றக் கட்டுப்பாட்டுப் பிரிவு விசாரணை நடத்தி வருகிறது. கடலோரப் பகுதியான பாலசோரில் அவை கண்டுபிடிக்கப்பட்டுள்ளதால், இந்தோனேசியாவில் இருந்து கடல் வழியாக அவை கடத்தி வரப்பட்டிருக்கலாம் என்ற சந்தேகமும் எழுந்துள்ளது.

இந்தச் சம்பவத்தின் பின்னணியில் சர்வதேச கடத்தல் கும்பல் இருக்கலாம் என அதிகாரிகள் சந்தேகிக்கின்றனர். மேலும், ஒராங்குட்டான்கள் கொல்கத்தாவில் உள்ள வாங்குபவர்களுக்கு விற்பனை செய்வதற்காக கொண்டு செல்லப்பட்டனவா என்பதையும் விசாரணை அதிகாரிகள் ஆராய்ந்து வருகின்றனர்.

போர்னியோ மற்றும் சுமாத்ரா தீவுகளை மட்டுமே பூர்வீகமாகக் கொண்ட ஒராங்குட்டான்களின் எண்ணிக்கை கடந்த நூற்றாண்டில் கணிசமாகக் குறைந்துள்ளது. ஒரு நூற்றாண்டுக்கு முன்பு 2.3 லட்சத்துக்கும் அதிகமாக இருந்த அவற்றின் எண்ணிக்கை, தற்போது காடுகளில் சுமார் 1.04 லட்சமாகக் குறைந்துள்ளதாக உலக வனவிலங்கு நிதியம் தெரிவித்துள்ளது.