ஹோர்முஸை மீண்டும் திறப்பதற்கான வழிமுறைகள் குறித்து ஐ.நா. பாதுகாப்பு கவுன்சில் வாக்களிக்க உள்ளது

ஹோர்முஸ் ஜலசந்தி வழியாகக் கப்பல்கள் பாதுகாப்பாகச் செல்வதை உறுதி செய்வதற்காக, நாடுகள் தாக்குதல் முறைகளைக் கையாளாமல் தற்காப்பு முறைகளைப் பயன்படுத்த அதிகாரம் அளிக்கும் பஹ்ரைன் முன்மொழிந்த தீர்மானத்தின் மீது ஐ.நா. பாதுகாப்பு கவுன்சில் வாக்களிக்க உள்ளது.

ஆறு வளைகுடா நாடுகளும் ஜோர்டானும் ஆதரித்துள்ள இந்தத் தீர்மானம், வழக்கமாக உலகின் ஐந்தில் ஒரு பங்கு எண்ணெய் கடந்து செல்லும் ஜலசந்தி வழியாக எண்ணெய் ஓட்டம் தடைபட்டதன் தாக்கத்தை உலக நாடுகள் உணர்ந்து வரும் வேளையில் வந்துள்ளது.

தங்களுக்குக் கிடைத்த தீர்மானத்தின் இறுதி வரைவு, முந்தைய முன்மொழிவுகளைப் பெருமளவில் நீர்த்துப்போகச் செய்வதாக அசோசியேட்டட் பிரஸ் செய்தி வெளியிட்டுள்ளது.

முந்தைய வரைவுகள், வழித்தடத்தைப் பாதுகாப்பதற்கும் சர்வதேச கப்பல் போக்குவரத்தில் தலையிடும் முயற்சிகளைத் தடுப்பதற்கும், சாத்தியமான இராணுவ நடவடிக்கையையும் உள்ளடக்கிய அனைத்துத் தேவையான வழிகளையும் பயன்படுத்த நாடுகளுக்கு அதிகாரம் அளித்திருக்கும்.

இறுதி வரைவின்படி, குறைந்தது ஆறு மாத காலத்திற்கு, ஹோர்முஸ் ஜலசந்தி மற்றும் அதை ஒட்டிய கடற்பரப்புகளில் போக்குவரத்தைப் பாதுகாக்கவும், சர்வதேச கப்பல் போக்குவரத்தில் தலையிடும் முயற்சிகளைத் தடுக்கவும், தேவையான மற்றும் சூழ்நிலைகளுக்கு ஏற்ற அனைத்து தற்காப்பு வழிமுறைகளையும் பயன்படுத்த நாடுகளுக்கு அதிகாரம் அளிக்கப்பட்டுள்ளது.

15 உறுப்பினர்களைக் கொண்ட பாதுகாப்புக் கவுன்சிலில் அமெரிக்கா, பிரிட்டன், சீனா, பிரான்ஸ் மற்றும் ரஷ்யா ஆகிய ஐந்து நிரந்தர உறுப்பினர்கள் உள்ளனர் இவர்கள் அனைவருக்கும் ஒரு தீர்மானத்தை வீட்டோ செய்யும் அல்லது தடுக்கும் அதிகாரம் உண்டு.

சாத்தியமான தாக்குதல் நடவடிக்கைகளுக்கு அங்கீகாரம் அளிக்கும் முந்தைய வரைவுகளை ரஷ்யாவும் சீனாவும் கடுமையாக எதிர்த்திருந்தன.