பாலஸ்தீனியர்களுக்கு மரண தண்டனை விதிக்க இஸ்ரேல் கென்னசெட் ஒப்புதல் அளித்தது

இஸ்ரேலியக் குடிமக்களைக் கொலை செய்ததாகக் குற்றம் சாட்டப்பட்ட மேற்குக் கரை பாலஸ்தீனியர்களுக்கு, தூக்கிலிடுவதன் மூலம் மரண தண்டனையை இயல்புநிலைத் தண்டனையாக ஆக்கும் சட்டத்தை, இஸ்ரேலின் நாடாளுமன்றமான நெசெட் திங்களன்று நிறைவேற்றியது.

பிரதமர் பெஞ்சமின் நெதன்யாகு உட்பட, 120 நாடாளுமன்ற உறுப்பினர்களில் மொத்தம் 62 பேர் இந்த மசோதாவை ஆதரித்தனர். அவரது ஆளும் கூட்டணி தீவிர வலதுசாரிக் கட்சிகளின் ஆதரவைச் சார்ந்துள்ளது, மேலும் இந்தச் சட்டம் நிறைவேற்றப்பட்டது அக்கட்சிகளுக்கு ஒரு பெரும் வெற்றியாகும்.

இஸ்ரேல் அரசு இன்று ஆட்டத்தின் விதிகளை மாற்றுகிறது என்று தேசியப் பாதுகாப்பு அமைச்சர் இட்டாமர் பென்-க்விர் கூறினார். 

இவர் மேற்குக் கரையில் குடியேறியவர், இவரது தீவிர தேசியவாதக் கட்சி இந்த மசோதாவை அறிமுகப்படுத்தியதுடன், தனது சட்டையின் காலரில் ஒரு தூக்குக் கயிற்றைக் குத்தியபடி இந்த நடவடிக்கையைப் பிரபலப்படுத்தியுள்ளார்.

யூதர்களைக் கொலை செய்பவர்கள் இனி சிறையில் நிம்மதியாக மூச்சுவிடவோ அல்லது வசதிகளை அனுபவிக்கவோ முடியாது என்று அவர் கூறினார். இது கொலை செய்யப்பட்டவர்களுக்கான நீதி நாள், எதிரிகளுக்கு ஒரு பாடமாக அமையும் நாள் என்று கூறினார்.

இஸ்ரேலிய நாடாளுமன்றத்தில் பென்-க்விர் தனது சக நெசெட் உறுப்பினர்களுடன் கொண்டாடும் படங்களை இஸ்ரேலிய ஊடகங்கள் வெளியிட்டன.

இந்தப் புதிய சட்டம் இஸ்ரேலின் உச்ச நீதிமன்றத்தில் சவாலுக்குட்படுத்தப்படும் என எதிர்பார்க்கப்படுகிறது. இந்த நடவடிக்கை இனவெறி மற்றும் கொடுங்கோன்மையானது என்று கூறியுள்ள இஸ்ரேலிய மற்றும் பாலஸ்தீனிய உரிமைக் குழுக்களால் கடுமையாக விமர்சிக்கப்பட்டுள்ளது.

பாலஸ்தீனியத் தாக்குதல்தாரிகளின் தாக்குதல்களை இது தடுக்கும் வாய்ப்பு குறைவு என்றும், ஆக்கிரமிக்கப்பட்ட பாலஸ்தீனியப் பகுதிகள் மீது இஸ்ரேலுக்கு இறையாண்மை அதிகார வரம்பு இல்லை என்றும் விமர்சகர்கள் கூறுகின்றனர்.

பாலஸ்தீனிய ஜனாதிபதி மாளிகை அந்தச் சட்டத்தை வன்மையாகக் கண்டித்து, அது ஒரு போர்க்குற்றத்திற்குச் சமமானது என்று கூறியுள்ளது.

இத்தகைய சட்டங்களும் நடவடிக்கைகளும் பாலஸ்தீன மக்களின் மன உறுதியை உடைக்கவோ, அவர்களின் அசைக்க முடியாத தன்மையைக் குலைக்கவோ செய்யாது மேலும், சுதந்திரம், விடுதலை மற்றும் கிழக்கு ஜெருசலேமைத் தலைநகராகக் கொண்ட ஒரு சுதந்திர பாலஸ்தீன அரசை நிறுவுவதற்கான அவர்களின் நியாயமான போராட்டத்தைத் தொடர்வதிலிருந்து அவர்களைத் தடுக்கவும் செய்யாது என்று அது வலியுறுத்தியது.