விகாரைகளிற்கு புனிதம்!

இலங்கையில் மேலும் இருபது மத வழிபாட்டுத் தலங்கள் புனித இடங்களாக வர்த்தமானியில் வெளியிடப்படும் என்று எதிர்பார்க்கப்படுகிறது, அதே நேரத்தில் இதுவரை ஒன்பது இடங்கள் வர்த்தமானியில் வெளியிடப்பட்டுள்ளன என்று தேசிய பௌதீக திட்டமிடல் திணைக்களம் தெரிவித்துள்ளது.

அதன்படி, ஹம்பாந்தோட்டையில் உள்ள உத்தகந்தர ரஜமஹா விகாரை, குருநாகல் தம்பதெனிய ரஜமஹா விகாரை, மொனராகலை கொட்டாசர பியாங்கல ரஜமஹா விகாரை, புத்தளம் வெஹெரகல ரஜமஹா விகாரை, நுவரெலியாவில் பம்பரகல ரஜமஹா விகாரை, கொழும்பு ஸ்ரீ சுதாரனந்த விஹார விகாரை , கேகாலையில் உள்ள கடிகமுவ ஸ்ரீ நாகவணாராமய மற்றும் மாத்தளை க்ஷேத்ராராம ரஜமஹா விகாரை ஆகியன புனித பிரதேசங்களாக வர்த்தமானியில் அறிவிக்கப்படும்.

தேசிய வெசாக் விழாவை மே 21 முதல் மே 27 வரை மாத்தளையில் நடத்த அரசாங்கம் திட்டமிட்டுள்ளது. ஜனாதிபதி ரணில் விக்கிரமசிங்க தலைமையில் வெசாக் பண்டிகையின் அங்குரார்ப்பணம் நடைபெறவுள்ளதுடன், மாத்தளை க்ஷேத்ராராம ரஜமஹா விகாரையை புனித பிரதேசமாக அபிவிருத்தி செய்வதற்கான உத்தியோகபூர்வ ஆவணங்கள் ஜனாதிபதியினால் விகாரை அதிகாரிகளிடம் கையளிக்கப்படவுள்ளது.

ஹம்பாந்தோட்டை ஹேனகடுவ ரஜமஹா விகாரை மற்றும் குருநாகல் கொன்னாவ ஸ்ரீ விஷ்ணு தேவாலயம் தொடர்பான அறிவிப்புகள் நகர அபிவிருத்தி மற்றும் வீடமைப்பு அமைச்சர் பிரசன்ன ரணதுங்கவின் கையொப்பத்திற்காக அனுப்பி வைக்கப்பட்டுள்ளதாக தேசிய பௌதீக திட்டமிடல் திணைக்களம் தெரிவித்துள்ளது.

மூன்று நிபந்தனைகளின் கீழ் புனித தலங்கள் பிரகடனம் செய்யப்படுவதாக அமைச்சர் பிரசன்ன ரணதுங்க சுட்டிக்காட்டினார்.

இலங்கையில் இதுவரை 130 வழிபாட்டுத் தலங்கள் புனிதப் பகுதிகளாக வர்த்தமானியில் அறிவிக்கப்பட்டுள்ளன. 1961ஆம் ஆண்டு ஒக்டோபர் மாதம் 16ஆம் திகதி கதிர்காமம் இலங்கையின் முதலாவது புனிதப் பிரதேசமாக அறிவிக்கப்பட்டதுடன், இம்மாதம் மாத்தளை க்ஷேத்ராராம ரஜமஹா விகாரை இலங்கையின் 130ஆவது புனிதப் பிரதேசமாக வர்த்தமானியில் பிரகடனப்படுத்தப்படவுள்ளது.