பாலியல் குற்றங்கள் தொடர்பாக ஆஸ்திரேலியாவில் முன்னாள் ஆயர் சிறையில் அடைக்கப்பட்டார்

முன்னாள் ஆயருக்கு ஆறரை ஆண்டு சிறைத் தண்டனை

மேற்கு ஆஸ்திரேலியாவில் முன்னாள் கத்தோலிக்க ஆயர் கிறிஸ்டோபர் சாண்டர்ஸுக்கு, சம்மதமின்றி பாலியல் ஊடுருவல் செய்த ஒரு குற்றச்சாட்டு மற்றும் சட்டவிரோதமான, அநாகரிகமான தாக்குதல் தொடர்பான 12 குற்றச்சாட்டுகளுக்காக ஆறு ஆண்டுகள் மற்றும் ஆறு மாதங்கள் சிறைத் தண்டனை விதிக்கப்பட்டுள்ளது. இந்தத் தண்டனை ஆகஸ்ட் 12ஆம் திகதியிலிருந்து முன்திகதியிட்டு கணக்கிடப்பட்டுள்ளது.

புரூமின் முன்னாள் ஆயரான கிறிஸ்டோபர் ஆலன் சாண்டர்ஸ், பல தசாப்தங்களாக ஆஸ்திரேலியாவின் மிக மூத்த கத்தோலிக்கர்களில் ஒருவராக விளங்கினார்.

சாண்டர்ஸ் ஆகஸ்ட் மாதம் குற்றவாளி எனத் தீர்ப்பளிக்கப்பட்டிருந்தார். அவரால் பாதிக்கப்பட்டவர்களில் ஒருவர் நீதிமன்றத்தில் வாசிக்கப்பட்ட அறிக்கையில், நான் அவர் பயன்படுத்திய ஒரு பொம்மையாக இருந்தேன் என்றும் இப்போது என் தலை வலியால் துடிக்கிறது. நான் மிகுந்த வேதனையில் இருக்கிறேன் என்றும் தெரிவித்துள்ளார். மற்றொருவர், என்னால் அதைப் பற்றிப் பேச முடியாது என்று கூறியதாக ஆஸ்திரேலிய ஒலிபரப்பு நிறுவனமான ஏபிசி தெரிவித்துள்ளது.

வடமேற்கு ஆஸ்திரேலியாவின் பரந்த கடலோரப் பகுதியையும் அங்குள்ள பல தொலைதூர பழங்குடியின சமூகங்களையும் உள்ளடக்கிய ப்ரூம் மறைமாவட்டத்திற்கு சாண்டர்ஸ் 20 ஆண்டுகளுக்கும் மேலாகத் தலைமை தாங்கினார்.

அவர் மீது பாலியல் துஷ்பிரயோகக் குற்றச்சாட்டுகள் ஆஸ்திரேலிய ஊடகங்களில் 2020ஆம் ஆண்டு வெளிவந்ததைத் தொடர்ந்து ஆயர் பதவியிலிருந்து விலகினார். இருப்பினும், ஓய்வுபெற்ற ஆயர் என்ற கௌரவப் பட்டத்தைத் தொடர்ந்து தக்க வைத்திருந்தார்.

ஆரம்பகட்ட காவல்துறை விசாரணையில், அவர் மீது குற்றவியல் நடவடிக்கை எடுப்பதற்குப் போதுமான ஆதாரங்கள் கிடைக்கவில்லை. ஆனால் குற்றச்சாட்டுகள் தொடர்பான சந்தேகங்களும் வதந்திகளும் தொடர்ந்து நிலவிய நிலையில், திருச்சபையின் உள்மட்ட விசாரணை பின்னர் தொடங்கப்பட்டது.

2019ஆம் ஆண்டு போப் பிரான்சிஸால் அறிமுகப்படுத்தப்பட்ட Vos estis lux mundi என்ற விதிமுறைகளின் கீழ், உயர் மட்ட திருச்சபை அதிகாரிகளுக்கு எதிரான பாலியல் துஷ்பிரயோகக் குற்றச்சாட்டுகளை விசாரிக்கும் வகையில் வத்திக்கான் 2022ஆம் ஆண்டு தனிப்பட்ட விசாரணையைத் தொடங்கியது. அந்த விசாரணையில் கிடைத்த தகவல்கள் பின்னர் காவல்துறையுடன் பகிரப்பட்டதைத் தொடர்ந்து, காவல்துறை தனது விசாரணையை மீண்டும் தொடங்கியது.

சாண்டர்ஸுக்கு தண்டனை விதிக்கப்பட்டதைத் தொடர்ந்து, ஆஸ்திரேலிய கத்தோலிக்க ஆயர்கள் மாநாட்டின் தலைவர் திமோதி காஸ்டெல்லோ, பாதிக்கப்பட்டவர்கள் மற்றும் உயிர் பிழைத்தவர்களுக்கு ஏற்பட்ட ஆழமான பாதிப்பை ஒப்புக்கொண்டார்.

உங்களுக்கு இழைக்கப்பட்ட வலி மற்றும் வேதனைக்காக நாங்கள் வருந்துகிறோம். திருச்சபையின் ஒரு தலைவரால் உங்கள் நம்பிக்கை இவ்வளவு நேரடியாகவும் ஆழமாகவும் காட்டிக்கொடுக்கப்பட்டதற்காக நாங்கள் வருந்துகிறோம் என்று அவர் தெரிவித்துள்ளார்.

இந்த வழக்கு, மத நிறுவனங்களில் அதிகாரம், பொறுப்பு, வெளிப்படைத்தன்மை மற்றும் பாதிக்கப்பட்டவர்களின் குரலுக்கு உரிய இடம் ஆகியவை எவ்வளவு முக்கியமானவை என்பதை மீண்டும் நினைவூட்டுகிறது.