பிரான்சில் மாணவர் போராட்டம் தீவிரம்: 625 பேர் கைது, 83 பாதுகாப்புப் படையினர் காயம்!

பிரான்சில் உயர்நிலைப் பள்ளி மாணவர்கள் முன்னெடுத்து வரும் போராட்டங்கள் தீவிரமடைந்துள்ள நிலையில், புதன்கிழமை நடைபெற்ற போராட்டங்களின்போது 625 பேர் தடுத்து வைக்கப்பட்டுள்ளதாக அந்நாட்டு உள்துறை அமைச்சர் லாரன்ட் நுனெஸ் தெரிவித்துள்ளார்.

பாட அட்டவணைகள், வகுப்பறைகளில் அதிகரித்துள்ள மாணவர் எண்ணிக்கை, ஆசிரியர் பற்றாக்குறை மற்றும் அண்மையில் நிலவிய கடும் வெப்பத்தால் வகுப்பறைகள் அதிக வெப்பமடைவது உள்ளிட்ட பல்வேறு பிரச்சினைகளை முன்வைத்து கடந்த வாரம் முதல் மாணவர்கள் போராட்டங்களில் ஈடுபட்டு வருகின்றனர்.

பாரிஸைச் சுற்றியுள்ள இல்-டி-பிரான்ஸ் பகுதியில் ஆரம்பமான போராட்டங்கள் தற்போது பிரான்சின் பல்வேறு நகரங்களுக்கும் பரவியுள்ளன.

பல உயர்நிலைப் பள்ளிகளை முற்றுகையிட்டு மாணவர்கள் போராட்டங்களில் ஈடுபட்டுள்ள நிலையில், சில இடங்களில் போராட்டங்கள் வன்முறையாக மாறியுள்ளன. இதன்போது காவல்துறையினர் மற்றும் ஜெண்டார்ம்கள் மீது எறிபொருட்கள் வீசப்பட்டதாகவும், தீவைப்பு முயற்சிகள் மற்றும் பிற வன்முறைச் சம்பவங்கள் இடம்பெற்றதாகவும் அதிகாரிகள் தெரிவித்துள்ளனர்.

புதன்கிழமை நடைபெற்ற போராட்டங்களில் குறைந்தது 83 காவல்துறை அதிகாரிகள் மற்றும் ஜெண்டார்ம்கள் காயமடைந்துள்ளதாக உள்துறை அமைச்சர் தெரிவித்துள்ளார். இதனிடையே, கடந்த வாரம் போராட்டங்கள் தொடங்கியதிலிருந்து 119 மாணவர்கள் மற்றும் கல்விப் பணியாளர்கள் காயமடைந்துள்ளதாக கல்வி அமைச்சர் எட்வார்ட் ஜெஃப்ரே தெரிவித்துள்ளார்.

போராட்டங்களால் நாடு முழுவதும் 356 பாடசாலைகள் பாதிக்கப்பட்டுள்ளதாகவும் தெரிவிக்கப்பட்டுள்ளது.

பாரிஸ், போர்டோ, லியோன் மற்றும் லில்லி உள்ளிட்ட நகரங்களில் நிலைமை மோசமடைந்துள்ளதாக தெரிவிக்கப்படும் நிலையில், சில பகுதிகளில் மோதல்களை கட்டுப்படுத்த காவல்துறையினர் கண்ணீர்ப்புகைக் குண்டுகளைப் பயன்படுத்தியுள்ளனர்.

மாணவர்களின் கல்வி மற்றும் பாடசாலைச் சூழல் தொடர்பான கோரிக்கைகளுக்கு தீர்வு காண்பதுடன், போராட்டங்கள் வன்முறையாக மாறுவதைத் தடுப்பதற்கான நடவடிக்கைகளும் அவசியமாகியுள்ளன.