சுரேஸ் சாலே நீதிமன்றில்:தப்பிக்க கோரும் கோத்தா!
அரச புலனாய்வு சேவையக முன்னாள் இயக்குனர் சுரேஸ் சாலே நீண்ட இடைவெளியின் பின்னராக கொழும்பு நிரந்தர மூவரடங்கிய மேல் நீதிமன்றத்தில் இன்று (16) நேரில் முன்னிலைப்படுத்தப்பட்டுள்ளார்.
ஊடகவியலாளர் பிரகீத் எக்னலிகொடவின் கடத்தல் மற்றும் அதைத் தொடர்ந்து காணாமல் ஆக்கப்பட்டமை தொடர்பாக வாக்குமூலம் அளிப்பதற்காக அவர் முன்னிலையாகியதாக தெரிவிக்கப்பட்டுள்ளது.
இதனிடையே முன்னாள் ஜனாதிபதி கோட்டாபய ராஜபக்சவுக்கு எதிராக கோட்டை நீதவான் நீதிமன்றத்தினால் விதிக்கப்பட்டுள்ள வெளிநாட்டுப் பயணத் தடையை நீக்குமாறு கோரி, அவர் அதே நீதிமன்றத்தில் மனுவொன்றைத் தாக்கல் செய்துள்ளார்.
சிங்கப்பூரில் இதய அறுவை சிகிச்சை செய்துகொண்ட பின்னர் மேற்கொள்ள வேண்டிய தொடர் மருத்துவச் சிகிச்சைகளைப் பெற்றுக்கொள்வதற்காக அங்கு செல்ல வேண்டியுள்ளதாக கூறி அவர் மனுவை தாக்கல் செய்துள்ளார்.
அதற்கமைய தமக்கு விதிக்கப்பட்டுள்ள வெளிநாட்டுப் பயணத் தடையை நீக்குமாறு கோரி மனுவைத் தாக்கல் செய்துள்ளார்.
உயிர்த்த ஞாயிறு தின பயங்கரவாதத் தாக்குதலுடன் தொடர்புபடுத்தி , சுமார் நான்கு மாதங்களுக்கு முன்னர் கோட்டை நீதவான் நீதிமன்றத்தினால் அவருக்கு வெளிநாட்டுப் பயணத் தடை விதிக்கப்பட்டிருந்தது.
முன்னதாக உயிர்த்த ஞாயிறு பயங்கரவாதத் தாக்குதல் தொடர்பான விசாரணைகளின் அடிப்படையில், பயங்கரவாதத் தடுப்புச் சட்டத்தின் கீழ் தம்மைக் கைது செய்வதைத் தடுக்கும் உத்தரவைப் பிறப்பிக்கக் கோரி கடந்த 9 ஆம் திகதியும் அவரால் மனு தாக்கல் செய்யப்பட்டுள்ளமை குறிப்பிடத்தக்கது.
எனினும், அந்த மனுவை நிராகரித்து மேன்முறையீட்டு நீதிமன்றம் உத்தரவிட்டிருந்தமை குறிப்பிடத்தக்கது.
Post a Comment