ஈரான் போருக்கான அமெரிக்கச் செலவு 45.1 பில்லியன் டாலர் – காங்கிரசிடம் பென்டகன் தெரிவிப்பு

ஈரான் போருக்காக அமெரிக்கா இதுவரை சுமார் 45.1 பில்லியன் டாலர்களை செலவிட்டுள்ளதாக பென்டகன் சட்டமியற்றுபவர்களிடம் தெரிவித்துள்ளதாக தகவல்கள் வெளியாகியுள்ளன.

செப்டம்பர் 3 ஆம் திகதி நிலவரப்படி போருக்கான நேரடி செலவு 43.6 பில்லியன் டாலர்களாக இருந்ததாகவும், கூடுதல் எரிபொருள் தேவைகளுக்காக மேலும் 1.5 பில்லியன் டாலர்கள் செலவிடப்பட்டதாகவும் தகவலறிந்த வட்டாரங்கள் தெரிவித்துள்ளன.

எனினும், இந்த 45.1 பில்லியன் டாலர் மதிப்பீடு போரினால் அமெரிக்காவுக்கு ஏற்பட்டுள்ள முழுமையான பொருளாதாரச் செலவை பிரதிபலிக்கவில்லை எனத் தெரிவிக்கப்பட்டுள்ளது. சேதமடைந்த அமெரிக்க தளங்கள் மற்றும் கட்டிடங்களைப் பழுதுபார்ப்பதற்கான செலவுகள் இதில் சேர்க்கப்படவில்லை. மேலும், இராணுவ நடவடிக்கைகளின் மறைமுகச் செலவுகள் குறித்த விரிவான கணக்கையும் காங்கிரஸிடம் பென்டகன் வழங்கவில்லை என ஒரு வட்டாரம் தெரிவித்துள்ளது.

இந்த புதிய மதிப்பீடு, காங்கிரஸ் பட்ஜெட் அலுவலகமான CBO ஆகஸ்ட் 1 ஆம் திகதி வரையிலான போருக்கான செலவு சுமார் 38 பில்லியன் டாலர்கள் என மதிப்பிட்டிருந்ததைவிட அதிகமாகும். இதற்கு முன்பு, ஜூலை மாதத்தில் போருக்கான செலவு 37.5 பில்லியன் டாலர்கள் என பென்டகன் மதிப்பிட்டிருந்தது.

CBO-வின் மதிப்பீட்டின்படி, போரின் போது சேதமடைந்த அமெரிக்க வசதிகளைப் பழுதுபார்ப்பதற்கான செலவுகளும் கணக்கில் சேர்க்கப்படவில்லை. போருக்கான செலவுகளில் பெரும்பகுதி வெடிமருந்துகள் மற்றும் இராணுவப் பொருட்களுக்கான செலவுகளிலிருந்து உருவாகிறது என்றும் CBO தெரிவித்துள்ளது.

மேலும், ஆகஸ்ட் 1 ஆம் திகதிக்குப் பின்னரும் போர் தொடரும் நிலையில், அமெரிக்காவுக்கு மாதந்தோறும் சுமார் 2 பில்லியன் முதல் 3 பில்லியன் டாலர்கள் வரை கூடுதல் செலவு ஏற்படக்கூடும் என CBO மதிப்பிட்டுள்ளது. சண்டை தீவிரமடையும் காலங்களில் இந்தச் செலவு மேலும் அதிகரிக்கக்கூடும் என்றும் அந்த அலுவலகம் குறிப்பிட்டுள்ளது.

இதனிடையே, போரின் பொருளாதார தாக்கம் அடுத்த ஆண்டுகளிலும் தொடரக்கூடும் என CBO எச்சரித்துள்ளது. 2027 ஆம் ஆண்டின் முதல் காலாண்டில் பணவீக்கம் அதிகரிக்க போரின் செலவுகள் பங்களிக்கக்கூடும் என்றும், பொருளாதாரம் குறித்த கவலைகள் ஏற்கனவே அதிகரித்துள்ள நிலையில், இது அமெரிக்க மக்களின் செலவுச் சுமையை மேலும் உயர்த்தக்கூடும் என்றும் அலுவலகம் காங்கிரஸிடம் தெரிவித்துள்ளது.