மக்கள் தெருக்களில் உறங்குவதை முடிவுக்குக் கொண்டுவர எனது முதல் உத்தரவைப் பிறப்பிப்பேன் - புதிய பிரதமர்

ஆண்டி பர்ன்ஹாம் டவுனிங் தெருவில் காலடி எடுத்து வைத்தபோது, ​​திரண்டிருந்த பெருந்திரளான ஆதரவாளர்கள் கரவொலி எழுப்பி ஆரவாரித்தனர். மேலும் புதிய பிரதமரின் முகத்தில் ஒரு பெரிய புன்னகை காணப்பட்டது.

அவர் 10 டவுனிங் தெருவில் வழங்கிய முதல் உரையில்:

பிரதமராகத் தனது நியமனம் சிந்தனைக்கும் புதிய தீர்மானத்திற்கும் உரிய தருணம் என்று ஆண்டி பர்ன்ஹாம் கூறினார்.

தன் தலைமுறை அரசியல்வாதிகள் தங்கள் திறனை மேம்படுத்திக்கொண்டு, தங்களுக்கு முன்னால் உள்ள சவால்களை எதிர்கொள்ள வேண்டும் என்று கூறுகிறார்.

பிரித்தானியா மீண்டும் நமது ஸ்திரத்தன்மையை மீட்டெடுக்க முடியும் என்பதை நிரூபிக்க வேண்டும். அதுவே நமது சவால் என்றார்.

வெஸ்ட்மின்ஸ்டரிலிருந்து அதிகாரத்தைப் பிரித்தெடுத்து, நாட்டின் ஒவ்வொரு பகுதிக்கும் அதைக் கொண்டு சேர்ப்பேன் என்றும் அதனால் அவர்களால் இன்னும் அதிகமாகச் செயல்பட முடியும் எனத் தெரிவித்தார். 

ஒரு புதிய பொருளாதாரத்தைக் கட்டமைப்பதாகவும், வாழ்க்கையின் அத்தியாவசியப் பொருட்களை மீண்டும் மலிவு விலையில் கிடைக்கச் செய்வதற்காக அவற்றை பொதுக் கட்டுப்பாட்டின் கீழ் கொண்டு வருவதாகவும், பிரித்தானியாவை மீண்டும் தொழில்மயமாக்கி பிரித்தானியத் தொழில்துறைக்கு ஆதரவளிப்பதாகவும் அவர் உறுதியளிக்கிறார்.

இந்த ஆண்டின் பிற்பகுதியில், பிரித்தானியா எந்த நிலையை அடைய வேண்டும் என்பதற்கான பாதையை விவரிக்கும் 10 ஆண்டுத் திட்டத்தை வகுக்கப் போவதாகக் கூறுகிறார்.

புதிய பிரதமர், நாளை முதல் வாழ்க்கைச் செலவு விஷயத்தில் மக்களுக்குச் சற்று நிம்மதி அளிக்கும் வகையிலான திட்டங்களையும், அதற்கான நிதியை எவ்வாறு திரட்டுவது என்பதையும் வகுக்கத் தொடங்குவதாகக் கூறியுள்ளார்.

கல்வி முறையை மாற்றுவதன் மூலம் அதிக இளைஞர்கள் வேலைவாய்ப்பைப் பெற உதவுவதாகவும், மனநல ஆதரவு உள்ளிட்ட கூடுதல் உதவிகள் வழங்கப்படும் என்றும் புதிய பிரதமர் கூறுகிறார்.

நலத்திட்டச் செலவைக் குறைப்பதற்கான நியாயமான மற்றும் நீடித்த வழியாக மேலும் பல மன்ற வீடுகள் கட்டப்படும் என்று அவர் கூறினார்.

மக்கள் சிறப்பாக வாழ உதவுவதைக் குறிப்பிட்ட அவர் நம் நாட்டில் தெருக்களில் உறங்குவதை முடிவுக்குக் கொண்டுவர எனது முதல் உத்தரவைப் பிறப்பிப்பேன் என்கிறார்.

சரியான விழுமியங்களையும் சரியான தரங்களையும் அரசாங்கத்தின் மையத்தில் வைப்பதில் கவனம் செலுத்தப் போவதாக பர்ன்ஹாம் கூறுகிறார்.

ஒரு புதிய தேசிய ஒற்றுமை உணர்வைக் கட்டியெழுப்புவதற்காக, நான் எனது முழு ஆற்றலையும் இதில் செலுத்துவேன் என்று கூறிய அவர், மக்களின் நலன்தான் நான் செய்யும் எல்லாவற்றின் மையமாக இருக்கும் எனத் தொடர்கிறார்.

இதுதான் பிரித்தானியா மீண்டும் நம்பத் தொடங்கும் தருணம்.நாம் நம்பிக்கையை மீட்டெடுக்கும் தருணம் என்று கூறி, பொதுமக்களையும் தனது ஆதரவாளர்களையும் தனக்குத் துணை நிற்குமாறு அவர் கேட்டுக்கொள்கிறார்.

பிரதமர் தனது உரையை நிறைவு செய்ததும், கூட்டத்தினர் அவரை கரவொலி எழுப்பி வரவேற்றனர். பின்னர் அவர் தனது மனைவியுடன் முத்தமிட்டு, எண் 10 இல்லத்தின் புகழ்பெற்ற கருப்புக் கதவுக்குள் நுழைவதற்கு முன்பு புகைப்படக் கலைஞர்களைப் பார்த்து கையசைத்தார்.