ஹோர்முஸ் போர்: கடலில்சிக்கியுள்ள 6,000 மாலுமிகளை மீட்க ஐ.நா. வேண்டுகோள்

மத்திய கிழக்கு போரில் ஈடுபட்டுள்ள நாடுகள், ஹோர்முஸ் ஜலசந்தியில் சிக்கியுள்ள சுமார் 6,000 மாலுமிகளை மீட்டு தாயகம் அழைத்து வர உதவுமாறு ஐக்கிய நாடுகள் சபை இன்று வெள்ளிக்கிழமை வலியுறுத்தியது.

நீர்வழியில் கடுமையான மனிதாபிமான மற்றும் மனித உரிமைகள் நெருக்கடியை எதிர்கொண்டுள்ள, சிக்கித் தவிக்கும் ஆயிரக்கணக்கான மாலுமிகளின் அவல நிலையைச் சரிசெய்ய அவசர நடவடிக்கை எடுக்க வேண்டும் என ஐ.நா மனித உரிமைகள் தலைவர் வோல்கர் டர்க் அழைப்பு விடுத்ததாக அவரது செய்தித் தொடர்பாளர் ஷபியா மன்டூ கூறினார்.

போர் நிறுத்தம் அமலில் உள்ளபோதும் வெளியேற முடியாமல், நூற்றுக்கணக்கான கப்பல்களில் உள்ள குறைந்தது 6,000 மாலுமிகள் ஜலசந்தியில் சிக்கித் தவிப்பதாக சர்வதேச கடல்சார் அமைப்பு தெரிவித்துள்ளது.

மோதலில் ஈடுபட்டுள்ள தரப்பினர், சிக்கித் தவிக்கும் மாலுமிகள் பாதுகாப்பாக வெளியேறி கப்பலிலிருந்து இறங்குவதற்கு வழிவகை செய்யவும், அத்தியாவசியப் பொருட்கள் சென்றடைவதை உறுதி செய்யவும் அவசரமாகப் பணியாற்ற வேண்டும் என்று ஜெனீவாவில் நடந்த செய்தியாளர் சந்திப்பில் மன்டூ கூறினார்.

பொதுமக்கள் கப்பல்கள் மீதான தாக்குதல்கள் ஏற்றுக்கொள்ள முடியாதவை, அவை நிறுத்தப்பட வேண்டும். அவை சர்வதேச மனிதாபிமானச் சட்டத்தின் கீழ் பாதுகாக்கப்படுகின்றன.

தூதரக உதவி மற்றும் அத்தியாவசியப் பொருட்களை வழங்குதல், மேலும் அவர்களை வெளியேற்றுவதற்கும் தாயகம் திரும்புவதற்கும் வசதி செய்தல் உள்ளிட்டவற்றின் மூலம், “சிக்கித் தவிக்கும் மாலுமிகளின் பாதுகாப்பை அவசரமாக உறுதி செய்யுமாறு” நாடுகள், கப்பல் உரிமையாளர்கள் மற்றும் தொடர்புடைய அனைத்துத் தரப்பினரையும் டர்க் வலியுறுத்துவதாக மன்டூ மேலும் கூறினார்.

தெஹ்ரான் ஆதரவு ஹூத்தி கிளர்ச்சியாளர்கள் செங்கடலில் எண்ணெய் கப்பல்கள் மீது தாக்குதல் நடத்தியதைத் தொடர்ந்து, அமெரிக்கா வெள்ளிக்கிழமை அன்று ஈரான் மீது புதிய தாக்குதல்களைத் தொடுத்தது. இந்த பதற்ற அதிகரிப்பு, ஒரு பீப்பாய் கச்சா எண்ணெய் விலையை 100 அமெரிக்க டாலரைத் தாண்டச் செய்தது.

பாதுகாப்பான பயணத்திற்குப் பணம் செலுத்துமாறு கப்பல்களை மிரட்டும் நோக்கில், ஈரான் அந்த வழித்தடத்தைப் பயன்படுத்தும் எண்ணெய்க் கப்பல்கள் மீது தாக்குதல்களைத் தொடர்ந்ததை அடுத்து, போருக்கு முன்பு உலகின் ஐந்தில் ஒரு பங்கு எண்ணெய் கடந்து சென்ற ஹோர்முஸ் ஜலசந்தி போக்குவரத்திற்குத் திறந்தே உள்ளது என்று அமெரிக்க இராணுவம் வலியுறுத்தியது.