பயங்கரவாதத் தடுப்புச் சட்டத்துக்கு மாற்றீடான புதிய சட்டமூலம்

இலங்கையில் கடந்த 47 வருடங்களாக நடைமுறையில் இருக்கும் பயங்கரவாதத் தடுப்புச் சட்டத்தை நீக்கி மாற்றீடாக அரசு கொண்டுவர உத்தேசித்திருக்கும் பயங்கரவாத எதிர்ப்பு சட்டம் இப்போது தயாராகி விட்டதாக கொழும்பு ஆங்கில ஊடகம் ஒன்று செய்தி வெளியிட்டுள்ளது.

இப்போது முன்மொழியப்பட்ட பயங்கரவாத எதிர்ப்பு சட்டத்தின் கீழ், பயங்கரவாதச் செயலைச் செய்பவர்களுக்கு மேல் நீதிமன்ற விசாரணைக்குப் பிறகு இருபது ஆண்டுகள் சிறைத்தண்டனை முதல் ஆயுள் தண்டனை வரை கடுமையான தண்டனைகள் வழங்கப்படும்.

“பயங்கரவாதத்திலிருந்து அரசைப் பாதுகாக்கும் சட்டம் - எண். 2026” என்ற புதிய சட்டம் நீதி மற்றும் தேசிய ஒருங்கிணைப்பு அமைச்சகத்தால் வெளியிடப்பட்டுள்ளது, இது தற்போதைய பயங்கரவாதத் தடுப்புச் சட்டத்தை மாற்றும் நடவடிக்கையாகும்.

முன்மொழியப்பட்ட சட்ட மூலம் பயங்கரவாதக் குற்றத்தை “வேண்டுமென்றோ அல்லது தெரிந்தோ, பயங்கரவாத நிலையைத் தூண்டும் எந்தவொரு செயலையும் செய்பவர்; பொதுமக்களையோ அல்லது பொதுமக்களின் எந்தவொரு பிரிவையோ அச்சுறுத்துபவர்; இலங்கை அரசாங்கத்தையோ அல்லது வேறு எந்த அரசாங்கத்தையோ அல்லது ஒரு சர்வதேச அமைப்பையோ எந்தவொரு செயலையும் செய்யவோ அல்லது செய்யாமல் இருக்கவோ கட்டாயப்படுத்துபவர்; 

அல்லது போரைப் பரப்புபவர், அல்லது பிராந்திய ஒருமைப்பாட்டை மீறுபவர், அல்லது இலங்கை அல்லது வேறு எந்த இறையாண்மை கொண்ட நாட்டின் இறையாண்மையை மீறுபவர், பயங்கரவாதக் குற்றத்தைச் செய்பவர்” என்றும் வரையறுக்கின்றது.

பயங்கரவாத அமைப்புடன் தொடர்புடையவர்களாகவோ, பயங்கரவாத வெளியீடுகளை ஊக்குவிப்பதற்காகவோ அல்லது பரப்புவதற்காகவோ அல்லது பயிற்சி அளித்ததற்காகவோ குற்றவாளிகளாகக் கண்டறியப்பட்டவர்களுக்கு பதினைந்து ஆண்டுகள் சிறைத்தண்டனையும் பதினைந்து மில்லியன் ரூபா அபராதமும் விதிக்கப்படும்.

நியாயமான சந்தேகத்தின் பேரில் நபர்களை 'நிறுத்தி சோதனையிடவும்', சந்தேக நபர்களிடமிருந்து பொருள்களைப் பறிமுதல் செய்யவும் இராணுவ வீரர்களுக்கு அதிகாரம் உள்ளது என்று 64 பக்க சட்ட மூலம் கூறுகின்றது.

ஒரு சந்தேகநபர் காவலில் எடுக்கப்பட்டவுடன், அத்தகைய கைதுகள் குறித்து 24 மணி நேரத்துக்குள் இலங்கை மனித உரிமைகள் ஆணையத்துக்கும் பொலிஸ்மா அதிபருக்கும் தெரிவிக்கப்பட வேண்டும்.

இந்த ஏற்பாடு பாதுகாப்பு அமைச்சின் செயலாளரிடமிருந்து இரண்டு மாதங்களுக்குரிய தடுப்புக்காவல் உத்தரவைப் பொலிஸ்மா அதிபர் அல்லது பிரதிப் பொலிஸ்மா அதிபர் பெறுவதற்கு உதவுகின்றது.

கைது செய்யப்பட்டதிலிருந்து ஒரு வருடம் வரை தடுப்புக்காவல் உத்தரவையைப் புதுப்பித்து நீடிக்க முடியும் என்று சட்டமூலத்தில் கூறப்பட்டுள்ளது.