யேர்மனி மலைப்பகுதியில் காட்டுத் தீ: 500 பேர் வெளியேற்றப்பட்டனர்!

மத்திய ஜேர்மனியில் மலை ஒன்றில் நேற்று வெள்ளிக்கிழமை ஏற்பட்ட காட்டுத் தீ காரணமாக சுமார் 500 பேர் வெளியேற்றப்பட்டுள்ளனர். 

ஹார்ஸ் மலைகளின் மிக உயரமான சிகரமான ப்ரோக்கனில் இருந்து சுற்றுலாப் பயணிகள், மலையேறுபவர்கள் மற்றும் விளையாட்டு வீரர்கள் கீழே இறக்கிவிடப்பட்டனர்.

கோனிக்ஸ்பெர்க் அருகே மதியம் தீ கண்டுபிடிக்கப்பட்டது. தீயை கட்டுப்படுத்தும் முயற்சிகள் இருந்தபோதிலும் தீ தொடர்ந்து பரவியது. சுமார் 150 தீயணைப்பு வீரர்கள் ஹார்ஸ் தேசிய பூங்காவில் உள்ள ப்ரோக்கன் மலையில் கடுமையான காட்டுத் தீயை எதிர்த்துப் போராடி வருகின்றனர்.

லோயர் சாக்சோனி மாநிலத்தில் இருந்து இரண்டு விமானங்கள், ஹார்ஸ் மாவட்டத்தில் இருந்து ஒரு விமானம் மற்றும் ஒரு உலங்குவானூர் தீயை அணைக்க பயன்படுத்தப்பட்டன. மேலும் ஆறு ஹெலிகாப்டர்கள் கோரப்பட்டுள்ளன.