திருகோணமலையில் காணி வழங்கக் கோரி மக்கள் போராட்டம்!

திருகோணமலை, பெரியகுளம் பகுதியில் தொழில் முயற்சியாளர்களுக்கு காணி வழங்கக் கோரி இன்று வெள்ளிக்கிழமை (10) பொது மக்கள்

கவனயீர்ப்பு போராட்டத்தில் ஈடுபட்டனர்.

திருகோணமலை குச்சவெளி பிரதேச செயலாளர் பிரிவுக்குட்பட்ட பெரியகுளம் பகுதியில் பொது மக்களில் சிலர் தங்களுக்கான குடியிருப்பு மற்றும் சுயதொழில் முயற்சிக்கு அரச காணியை வழங்குமாறு கோரி குறித்த பகுதியில் கவனயீர்ப்பு போராட்டத்தில் ஈடுபட்டு வருகின்றார்கள். 

அரச காணி ஒன்றை பெற்றுக்கொள்வதற்காக விண்ணப்பித்து, பல காணிக் கச்சேரிகளுக்குச் சென்றும், நீண்டகாலமாக அரச காணிக்காக தாம் காத்திருப்பதாகவும், எனினும் இதுவரை தமக்கு காணி வழங்கப்படவில்லை எனவும் தமக்கு காணியை பெற்றுக்கொடுக்க சம்பந்தப்பட்ட அதிகாரிகள் நடவடிக்கை எடுக்க வேண்டும் எனவும் அந்த மக்கள் கோரிக்கை விடுக்கின்றனர்.

அத்துடன், ஒரு இலட்சம் காணித்துண்டுகள் வழங்கும் திட்டத்தின் கீழ் தொழில் முயற்சிக்காக 160 காணித்துண்டுகள் இப்பகுதியில் 2021ஆம் ஆண்டு வழங்கப்பட்டன.

இருப்பினும், அவற்றில் 15க்கும் குறைவான காணிகள் மாத்திரமே தொழில் முயற்சிக்காக பயன்படுத்தப்பட்டு வருகின்றன எனவும், ஏனைய காணித்துண்டுகள் எதுவித பராமரிப்பு இன்றி காணப்படுவதாகவும், அவற்றை சுயதொழில் முயற்சியில் ஈடுபட்டு வருகின்ற அரச காணி இல்லாத சரியான நபர்களுக்கு பகிர்ந்தளிப்பதன் மூலம் நாட்டின் அபிவிருத்திக்கு பங்களிப்பு வழங்க முடியும் எனவும் ஆர்ப்பாட்டக்காரர்கள் குறிப்பிடுகின்றனர்.