ஐரோப்பிய ஒன்றியம், நேட்டோவுக்கு எதிராக செக் குடியரசில் பல்லாயிரக்கணக்கான மக்கள் போராட்டம்!

ஐரோப்பிய ஒன்றியம் மற்றும் நேட்டோவிற்கு எதிராக நேற்று சனிக்கிழமையன்று செக் குடியரசு நாட்டில் தீவிர வலது சாரிகள் மற்றும் இடது சாரிகளைச் சேர்ந்து பல்லாயிரக்கணக்கான எதிர்ப்பாளர்கள் ஆர்ப்பாட்டம் செய்தனர்.

ஐரோப்பிய ஒன்றியம் மற்றும் நேட்டோவுக்கு எதிராக குரல் கொடுக்கும் அதே வேளையில் எரிசக்தி விலைகளை கட்டுக்குள் கொண்டுவர ஆளும் கூட்டணிக்கு அழைப்பு விடுத்து சுமார் 70,000 பேர் ப்ராக் வீதிகளில் இறங்கினர்.

பல தீவிர வலதுசாரிகள், இடது சாரிகள் மற்றும் அரசியல் குழுக்களின் போராட்ட அமைப்பாளர்கள் மத்திய ஐரோப்பிய நாடு இராணுவ ரீதியாக நடுநிலை வகிக்க வேண்டும் என்றும் ரஷ்யாவிலிருந்து எரிவாயு இறக்குமதியை பராமரிக்க வேண்டும் என்றும் கூறினர்.

இந்த இலையுதிர்காலத்தில் நமது பொருளாதாரத்தை அழிக்கும் எரிசக்தி விலைகள், குறிப்பாக மின்சாரம் மற்றும் எரிவாயு போன்ற பிரச்சினைகளைத் தீர்ப்பதில் மாற்றத்தைக் கோருவதே எங்கள் ஆர்ப்பாட்டத்தின் நோக்கம்" என்று நிகழ்வின் இணை அமைப்பாளர் ஜிரி ஹேவல் உள்ளூர் ஊடகங்களுக்குத் தெரிவித்தார்.

எதிர்ப்பாளர்கள் பழமைவாத பிரதம மந்திரி Petr Fiala பதவி விலகக் கோரினர். பல விடயங்களில் அவரது கூட்டணி அரசாங்கத்தை விமர்சித்தனர். அதே நேரத்தில் அவரின் மேற்கத்திய சார்பு கொள்கைகளை அவதூறு செய்தனர்.

செக் குடியரசில் நடந்த நிகழ்வுகள், ஐரோப்பாவின் எரிசக்தி நெருக்கடி எவ்வாறு அரசியல் உறுதியற்ற தன்மையை தூண்டுகிறது என்பதை காட்டுகின்றன.

புதிய ஐரோப்பிய கணக்கெடுப்பின்படி, தற்போதைய எரிசக்தி நெருக்கடியின் காரணமாக அதிக பணவீக்கம் சமூக அமைதியின்மை, எதிர்ப்புகள் மற்றும் வேலைநிறுத்தங்களைத் தூண்டும் என்று பல ஐரோப்பியர்கள் கவலைப்படுகிறார்கள்.

செக் குடியரசு நாட்டில் உள்ள எதிர்ப்பாளர்கள் உக்ரைனில் நடந்த போரில் ரஷ்யா மீதான ஐரோப்பிய ஒன்றிய பொருளாதாரத் தடைகளில் சேருவதற்கு அரசாங்கத்தை கண்டித்தனர். அவை எரிவாயு மற்றும் மின்சார விலைகளை உயர்வுக்கு காரணமாக இருப்பதாகக் கூறினர்.