ஏதென்ஸில் கட்டிடம் வெடித்து இடிந்து விழுந்ததில் 6 பேர் உயிரிழப்பு

கிறீஸ் தலைநகர் ஏதென்ஸின் வரலாற்றுச் சிறப்புமிக்க பிளாக்கா பகுதியில் வெடிவிபத்து ஏற்பட்டு, மூன்று மாடிக் கட்டிடம் முழுவதும் இடிந்து விழுந்ததில் ஆறு பேர் உயிரிழந்தனர்.

வெள்ளிக்கிழமை நடந்த இந்தச் சம்பவத்தில், நான்கு அமெரிக்க சுற்றுலாப் பயணிகள், ஒரு பிரிட்டன் நாட்டவர் மற்றும் ஒரு கிரேக்க நாட்டவர் உயிரிழந்ததாக தெரிவிக்கப்பட்டுள்ளது. கிரேக்க நாட்டவர் அதே கட்டிடத்தில் வசித்து வந்த வயதான தம்பதிகளில் ஒருவராவார்.

வெடிவிபத்தில் அருகிலிருந்த கட்டிடங்களும் சேதமடைந்தன. கட்டிடத்தின் இடிபாடுகள் சாலையில் சிதறிக் கிடந்தன. அருகிலிருந்த சில கட்டிடங்களில் வசித்தவர்கள் பாதுகாப்புக்காக வெளியேற்றப்பட்டனர்.

சம்பவ இடத்தில் மீட்புப் பணியாளர்கள் அகழ்வு இயந்திரங்கள் மற்றும் வெப்பப் படமெடுக்கும் கருவிகளைப் பயன்படுத்தி தேடுதல் பணியில் ஈடுபட்டனர். சனிக்கிழமை பிற்பகுதிக்குள் ஆறு பேரின் உடல்களும் மீட்கப்பட்டன.

இந்த வெடிவிபத்துக்கு எரிவாயுக் கசிவு காரணமாக இருக்கலாம் என சந்தேகிக்கப்படுகிறது. சம்பவம் தொடர்பாக அதிகாரிகள் தொடர்ந்து விசாரணை நடத்தி வருகின்றனர்.

அக்ரோபோலிஸ் மற்றும் ஒலிம்பியன் ஜீயஸ் கோயில் போன்ற முக்கிய சுற்றுலாத் தலங்களுக்கு அருகிலேயே இந்தச் சம்பவம் இடம்பெற்றுள்ளது. பிரிட்டன் வெளியுறவு அலுவலகமும் சம்பவம் குறித்து அறிந்துள்ளதாகவும், உள்ளூர் அதிகாரிகளுடன் தொடர்பில் இருப்பதாகவும் தெரிவித்துள்ளது.