16 வயதுக்குட்பட்டவர்களுக்கு சமூக ஊடகத் தடை விதிக்க நியூசிலாந்து பரிந்துரைத்துள்ளது.

நியூசிலாந்து  அரசாங்கம் 16 வயதுக்குட்பட்ட குழந்தைகள் சமூக ஊடகங்களைப் பயன்படுத்துவதைத் தடைசெய்யும் சட்டத்தை திங்களன்று அறிமுகப்படுத்தியது.

இணையப் பாதுகாப்பு மசோதாவின்படி, இன்ஸ்டாகிராம், டிக்டாக், ஸ்னாப்சாட் மற்றும் ஃபேஸ்புக் போன்ற தளங்கள், முக வயது மதிப்பீடு மற்றும் டிஜிட்டல் அடையாள அட்டை போன்ற கருவிகளைப் பயன்படுத்தி, பயனர்கள் 16 அல்லது அதற்கு மேற்பட்ட வயதுடையவர்கள் என்பதைச் சரிபார்க்க வேண்டும். இதை மீறுபவர்களுக்கு உலகளாவிய வருவாயில் 10% வரை அபராதம் விதிக்கப்படும்.

தளங்கள் , இளம் பயனர்களுக்குத் தாங்கள் ஏற்படுத்தும் அபாயங்களையும் மதிப்பிட்டு , அவற்றைக் குறைப்பதற்கான முயற்சிகள் குறித்தும் அறிக்கை அளிக்க வேண்டும் .

குழந்தைகளுக்கு ஏற்படும் பாதிப்பு புறக்கணிக்க முடியாத அளவுக்குப் பெரியது என்று பிரதமர் கிறிஸ்டோபர் லக்ஸன் கூறினார். 

மனநலம், உறக்கம் மற்றும் கல்வி ஆகியவற்றில் ஏற்படும் பாதிப்புகளைச் சுட்டிக்காட்டி, "நியூசிலாந்து குழந்தைகளின் ஒரு தலைமுறைக்கு இழைக்கப்படும் தீங்கை எங்களால் ஏற்றுக்கொள்ளவே முடியாது," என்று அவர் கூறினார். அரசாங்கத்தின் தரவுகளின்படி, 13 முதல் 17 வயதுக்குட்பட்ட குழந்தைகளில் மூன்றில் ஒருவர் தற்போது ஒரு நாளைக்குக் குறைந்தது ஐந்து மணிநேரம் சமூக ஊடகங்களில் செலவிடுகின்றனர்.

இந்த மசோதா சட்டரீதியான சுமையை குடும்பங்கள் மீது அல்ல, தளங்கள் மீது சுமத்துகிறது என்றும், "குழந்தைகள், அவர்களது பெற்றோர் அல்லது பராமரிப்பாளர்களுக்கு எந்தத் தண்டனைகளும் முன்மொழியப்படவில்லை" என்றும் கல்வி அமைச்சர் எரிக்கா ஸ்டான்ஃபோர்ட் கூறினார்.