கொக்குத்தொடுவாய்க்கு விடுமுறை?

 

கொக்குத்தொடுவாய் மனிதப் புதைகுழி விவகாரம் தொடர்பில் சான்றாதாரங்களை காரணங்காட்டி காணாமல் போனோர் அலுவலகம் கால அவகாசத்தை கோரியுள்ளது.

வழக்கு முல்லைத்தீவு நீதவான் நீதிமன்றத்தில் இன்று வியாழக்கிழமை (28)  விசாரணைக்கு எடுத்துக் கொள்ளப்பட்ட நிலையில் வழக்கு மீண்டும் நவம்பர் மாதம் ஆறாம் திகதிக்கு தவணை இடப்பட்டுள்ளது 

குறித்த புதைகுழியில் மீட்கப்பட்ட சான்று பொருட்கள் தொடர்பில் உறவினர்கள் அடையாளம் காட்டுவதற்கான விளம்பரங்கள், காணாமல் போனோர் அலுவலகத்தால் ஊடகங்களில் பிரசுரிக்கப்பட்டு இருப்பதாகவும் அது தொடர்பான அறிக்கைகள் நீதிமன்றுக்கு சமர்ப்பிப்பதற்கு கால அவகாசம் தேவை என கோரப்பட்டதற்கு  அமைவாக வழக்கு மூன்று மாதங்களின் பின்னராக நவம்பர் மாதம் 6 ஆம் திகதிக்கு தவணை இடப்பட்டுள்ளது 

முல்லைத்தீவு கொக்குத்தொடுவாய் மனித புதைகுழி அகழ்வுப் பணி நிறைவில்  52 மனித எச்சங்கள் மீட்கப்பட்டிருந்தது. அகழ்வுப் பணியும் நிறைவு செய்யப்பட்டிருந்தது 

சான்றுப் பொருட்கள் தொடர்பான தகவல்கள் தெரிந்தவர்களை தொடர்பு கொண்டு அது தொடர்பில் தகவல்களை வழங்குமாறு காணாமல் போனோர் அலுவலகத்தினால் ஊடகங்களில் பிரச்சாரப்படுத்தப்பட்டிருந்தது.

அவ்வாறான பின்னணியில் இறுதி அறிக்கைகள் நீதிமன்றத்திற்கு சமர்ப்பிப்பதற்கு கால அவகாசம் தேவை என்ற அடிப்படையில் குறித்த வழக்கு நவம்பர் மாதம் ஆறாம் திகதிக்கு தவணை இடப்பட்டுள்ளது.