கோத்தபாயவிற்கு தலையிடி!

 

கோத்தபாய ராஜபக்ச ஜனாதிபதியாக பதவியேற்றதை தொடர்ந்து மிருசுவில் படுகொலை தொடர்பாக மரண தண்டனை விதிக்கப்பட்ட நிலையில் சிறையிலிருந்த முன்னாள் இராணுவ அதிகாரி ஒருவரை விடுவித்த விவகாரம் சூடு பிடித்துள்ளது. விடுவிக்கப்பட்ட படை அதிகாரியான சுனில் ரத்நாயக்கவுக்கு எதிராக தாக்கல் செய்யப்பட்ட அடிப்படை உரிமை மீறல் மனுக்களை 2025 ஜனவரி 15 ஆம் திகதி இலங்கை உயர் நீதிமன்றம் விசாரிக்கவுள்ளது.

முன்னாள் ஜனாதிபதி கோட்டாபய ராஜபக்சவினால் 2020ஆம் ஆண்டு முன்னாள் இராணுவ அதிகாரி சுனில் ரத்நாயக்கவுக்கு வழங்கப்பட்ட ஜனாதிபதி மன்னிப்பை எதிர்த்தும், தீர்மானத்தை செல்லுபடியற்றதாக்குமாறும் கோரி உயர் நீதிமன்றத்தில் மனுக்கள் தாக்கல் செய்யப்பட்டுள்ளன. 

மிருசுவில் படுகொலையில் பாதிக்கப்பட்டவர்களின் குடும்பத்தினர், மாற்றுக் கொள்கைகளுக்கான நிலையம் மற்றும் இலங்கை மனித உரிமைகள் ஆணைக்கு முன்னாள் உறுப்பினர் அம்பிகா சற்குணநாதன் ஆகியோரால் மனுக்கள் தாக்கல் செய்யப்பட்டிருந்தன.

2000 ஆம் ஆண்டு டிசெம்பர் மாதம் யாழ்ப்பாணம் மிருசுவிலில் 8 பொதுமக்கள் படுகொலை செய்யப்பட்ட வழக்கில் முன்னாள் இராணுவ அதிகாரி சுனில் ரத்நாயக்க குற்றவாளி என அறிவிக்கப்பட்டு 2015 ஆம் ஆண்டு கொழும்பு மேல் நீதிமன்றத்தால் அவருக்கு மரண தண்டனை விதிக்கப்பட்டது.

2000 ஆம் ஆண்டு டிசம்பர் 19 ஆம் திகதி முகமாலை முன்னரங்கத்தை அண்மித்த மிருசுவில் கிராமத்தில் தமது சொத்துக்களை எடுத்துவரச்சென்ற இடம்பெயர்ந்த குடும்பங்களை சேர்ந்த எண்மர் படையினரால் கொலை செய்யப்பட்டிருந்தனர்.கொலை செய்யப்பட்டவர்களின் உடலங்கள் மலகூட குழியில் வீசப்பட்டிருந்த நிலையில் உயிர் தப்பித்த இளைஞர் ஒருவரால் அம்பலப்படுத்தப்பட்டிருந்தது.

சம்பவம் தொடர்பில் 5 இராணுவ சிப்பாய்களுக்கு எதிராக சட்டமா அதிபர் குற்றப்பத்திரிகை தாக்கல் செய்திருந்த நிலையில், சுனில் ரத்நாயக்கவிற்கு எதிரான குற்றச்சாட்டுகள் போதிய ஆதாரங்களுடன் நிரூபிக்கப்பட்டதால் அவருக்கு மரண தண்டனை விதித்து நீதிமன்றம் தீர்ப்பளித்தது.ஏனைய 4 இராணுவத்தினர் போதிய ஆதாரங்கள் இல்லாததால்; விடுவிக்கப்பட்டமை குறிப்பிடத்தக்கது.