காசா நகர பள்ளி இஸ்ரேல் தாக்குதல்: 100க்கு மேற்பட்டவர்கள் பலி!

காசாவில் அமைந்துள்ள அல்-தபெய்ன் பள்ளி மீது இஸ்ரேல் நடத்திய தாக்குதலில் 100க்கு மேற்பட்ட பொதுமக்கள் கொல்லப்பட்டதாகவும் 50க்கு மேற்பட்டவர்கள் காயமடைந்து மருத்துவமனையில் அனுமதிக்கப்பட்டதாகவும் பாலஸ்தீன சுகாதார அமைச்சு மற்றும் பாலஸ்தீன ஊடகங்கள் தெரிவிக்கின்றன. 

ஆனால் காசாப் பள்ளி மீது நடத்திய தாக்குதலில் பாலஸ்தீன போராளிகள் கொல்லப்பட்டதாக இஸ்ரேல் கூறியுள்ளது.

இஸ்ரேலிய உளவுத்துறையின் அடிப்படையில், ஏறத்தாழ 20 ஹமாஸ் மற்றும் இஸ்லாமிய ஜிஹாத் போராளிகள், மூத்த தளபதிகள் கொல்லப்பட்டதாக இஸ்ரேலின் பாதுகாப்பு படைகளின் செய்தித் தொடர்பாளர் நடவ் ஷோஷானி எக்ஸ் தளத்தில் கூறினார்.

இந்த வளாகம் மற்றும் அதற்குள் தாக்கப்பட்ட மசூதி, ஹமாஸ் மற்றும் இஸ்லாமிய ஜிஹாத் இராணுவ வசதியாக செயல்பட்டது என்று அவர் மேலும் கூறினார்.

இஸ்ரேலின் இந்த உரிமை கோரலுக்கு எந்த ஆதாரமும் வழங்கப்படவில்லை.

ஆயுதங்கள் மற்றும் இராணுவ உபகரணங்களுக்காக செலவழிக்க இஸ்ரேலுக்கு 3.5 பில்லியன் டாலர்களை அமெரிக்கா வழங்கவுள்ளது.

காசா மீதான இஸ்ரேலின் போரில் குறைந்தது 39,699 பேர் கொல்லப்பட்டுள்ளனர் மற்றும் 91,722 பேர் காயமடைந்துள்ளனர். 

அக்டோபர் 7 அன்று ஹமாஸ் தலைமையிலான தாக்குதல்களின் போது இஸ்ரேலில் 1,139 பேர் கொல்லப்பட்டனர் மற்றும் 200 க்கும் மேற்பட்டோர் சிறைபிடிக்கப்பட்டனர்.