யாழில். வீடொன்றில் சட்டவிரோதமாக இயங்கிய கொல்களம் - இரண்டு பசுக்கள் உயிருடன் மீட்பு

யாழ்ப்பாணத்தில் வீடொன்றில் சட்டவிரோதமான முறையில் இயங்கி வந்த கொல்களத்தில் இருந்து இரண்டு பசு மாடுகள் உயிருடன் மீட்கப்பட்டுள்ளதுடன் , பெருந்தொகை இறைச்சியும் கைப்பற்றபட்டுள்ளதுடன் , இருவர் கைது செய்யப்பட்டுள்ளனர். 

ஐந்து சந்தி பகுதியில் வீடொன்றில் சட்டவிரோதமான முறையில் மாடுகள் இறைச்சியாக்கப்படுவதாக பொலிஸாருக்கு கிடைத்த இரகசிய தகவலின் அடிப்படையில் குறித்த வீட்டினை பொலிஸார் முற்றுகையிட்டனர். 

அதன் போது , மாடுகளை இறைச்சியாக்கி அதனை பங்கு பிரித்துக்கொண்டிருந்த இருவரை பொலிஸார் கைது செய்ததுடன் , அங்கிருந்த பெருந்தொகையான இறைச்சியையும் கைப்பற்றினர்.  

வீட்டில் மேற்கொள்ளப்பட்ட சோதனை நடவடிக்கையில் , இறைச்சியாக்கும் நோக்குடன் கட்டி வைக்கப்பட்டிருந்த இரண்டு பசு மாடுகளையும் பொலிஸார் மீட்டனர். 

கைது செய்யப்பட்ட இருவரையும் , யாழ்ப்பாண பொலிஸ் நிலையத்தில் தடுத்து வைத்து பொலிஸார் மேலதிக விசாரணைகளை முன்னெடுத்துள்ளனர்.