ஐரோப்பிய ஒன்றியத்தில் இணையும் பேச்சுவார்த்தையை நிராகரித்த ஜஸ்லாந்து மக்கள்

ஐரோப்பிய ஒன்றியத்துடனான உறுப்புரிமைப் பேச்சுவார்த்தைகளை மீண்டும் தொடங்குவதற்கு ஐஸ்லாந்து 'இல்லை' என வாக்களித்ததாக இறுதி வாக்கெடுப்பு முடிவுகள் இன்று காட்டின.

ஒரு புதிய  உறுப்பினரை வரவேற்பதில் ஆர்வமாக இருந்த பிரஸ்ஸல்ஸுக்கு இது ஒரு பெரும் பின்னடைவை ஏற்படுத்தியுள்ளது.

இன்று நடைபெற்ற வாக்கெடுப்பில், 13 ஆண்டுகளுக்கு முன்பு இடைநிறுத்தப்பட்ட ஐரோப்பிய ஒன்றிய நுழைவுப் பேச்சுவார்த்தைகளை மீண்டும் தொடங்குவதை 52.8 சதவீத ஐஸ்லாந்து மக்கள் நிராகரித்துள்ளனர், அதே நேரத்தில் 47.2 சதவீதம் பேர் 'ஆம்' என்று வாக்களித்துள்ளனர்.

சுமார் 400,000 மக்கள்தொகை கொண்ட அந்த நாடு, தனது பொருளாதாரத்தைச் சீர்குலைத்த 2009 ஆம் ஆண்டு நிதி நெருக்கடியைத் தொடர்ந்து ஐரோப்பிய ஒன்றியத்தில் சேர விண்ணப்பித்தது.

பின்னர் 2013-ல் ஐரோப்பிய ஒன்றியத்தை எதிர்க்கும் அரசாங்கம் ஆட்சிக்கு வந்தபோது, ​​உறுப்பினர் சேர்க்கைப் பேச்சுவார்த்தைகள் இடைநிறுத்தப்பட்டன.

அதிகரித்து வரும் சர்வதேச பதட்டங்களுக்கு மத்தியில், சமூக ஜனநாயகப் பிரதமர் கிறிஸ்ட்ரூன் ஃப்ரோஸ்டாடோட்டிர் தலைமையிலான ஐஸ்லாந்தின் தற்போதைய அரசாங்கம், ஐரோப்பிய ஒன்றியத்துடனான தங்கள் உறவுகளை ஆழப்படுத்துவது குறித்து ஐஸ்லாந்து மக்களின் கருத்தைக் கேட்க விரும்பியது.

ஐரோப்பிய பொருளாதாரப் பகுதி மற்றும் தடையற்ற நடமாட்டத்திற்கான ஷெங்கன் மண்டலம் ஆகியவற்றில் உறுப்பினராக இருப்பதால், இந்த சிறிய வட அட்லாண்டிக் தீவு ஏற்கனவே ஐரோப்பிய ஒன்றியத்துடன் நெருங்கிய தொடர்பைக் கொண்டுள்ளது. எனினும் இந்தத் தொடர்புகள் மாற்றமின்றித் தொடரும்.

தொழில்நுட்ப ரீதியாக, பொது வாக்கெடுப்பின் முடிவு சட்டப்பூர்வமாக கட்டுப்படுத்தாது, ஆனால் அதனை மதிப்பதாக அரசாங்கம் உறுதியளித்துள்ளது.

அரசாங்கம் தனது திட்டங்களை முன்வைப்பதற்காக, நாளை பிற்பகல் 1 மணிக்கு (மலேசிய நேரப்படி இரவு 9 மணிக்கு) ஒரு செய்தியாளர் சந்திப்பை நடத்தும்.