மிருசுவில் வாள்வெட்டுக் குழு பயன்படுத்திய மகிழுந்து மீட்பு!

 
மிருசுவில் பகுதியிலுள்ள வீடொன்றுக்குள் புகுந்து அடாவடியில் ஈடுபட்ட வாள்வெட்டுக் கும்பல் தப்பித்துச் சென்ற மகிழுந்து மீட்கப்பட்டுள்ளது. அது தொடர்பில் முன்னெடுக்கப்பட்ட விசாரணைகளின் அடிப்படையில் ஒருவர் கைது செய்யப்பட்டுள்ளார் என்று கொடிகாமம் காவல்துறையினர் தெரிவித்தனர்.

மகிழுந்து மற்றும் உந்துருளிகளில் வந்த வாள்வெட்டுக் கும்பல் அடாவடியில் ஈடுபட்டு தப்பித்த போது, அந்தப் பகுதியைச் சேரந்த இளைஞர்கள் துரத்திச் சென்றனர். எனினும் கும்பல் ஓடித் தப்பித்தது.

வாள் வெட்டுக் கும்பல் பயணித்த மகிழுந்தின் சக்கரம் ஒன்று காற்றுப் போனதால் அதனை வீதியில் கைவிட்டு கும்பல் அவசர அவசரமாக தப்பிச் சென்றுள்ளது. இந்த நிலையிலேயே கைவிட்டுச் சென்ற மகிழுந்தை கொடிகாமம் காவல்துறையினர் மீட்கப்பட்டுள்ளனர்.

நேற்று முன்தினம் மிருசுவில் வடக்கு வீதியில் உள்ள தம்பு ஜெயானந்தம் என்பவரது வீட்டுக்குள் வாள்கள் பொல்லுகளுடன் பத்துக்கும் மேற்பட்டோர் கொண்ட கும்பல் புகுந்தது.

வீட்டில் இருந்தவர்களையும் அயல் வீட்டில் வசித்தவர்களையும் சரமாரியாக கும்பல் தாக்கியது.

அப்போது அயலில் உள்ளவர்கள் கூக்குரல் இட்டதுடன் கிராம மக்கள் திரட்டனர். அதனால் மகிழுந்து மற்றும் உந்துருளிகளைில் கும்பல் தப்பி ஓடியது போது மக்கள் கும்பலை விரட்டிச்சென்றனர்.

வீதியில் உழவு இயந்திரத்தில் பயணித்த பாலேந்திரன் றஜீபன் என்பவரையும் அந்தக் கும்பல் தாக்கியது. அவரது உழவு இயந்திரத்தையும் சேதமாக்கிவிட்டு கும்பல் தப்பித்தது.

இதன்போது கும்பலைச் சேர்ந்த சிலர் பயணித்த மகிழுந்தின் சக்கரம் ஒன்று காற்றுப்போனதனால் அதனைக் கைவிட்டுவிட்டு அதில் பயணித்தோர் தப்பிச்சென்றுவிட்டனர்.

மகிழுந்து காவல்துறையினரால் கைப்பற்றப்பட்டு கொடிகாமம் காவல்  நிலையத்துக்கு கொண்டுசெல்லப்பட்டது.

முதற்கட்ட விசாரணையின் போது, அந்தக் மகிழுந்தின் உரிமையாளர் சாவகச்சேரி சரசாலை வடக்கைச் சேர்ந்தவர் என அடையாளம் காணப்பட்டார்.

மகிழுந்து வாடகைக்கு கொடுக்கப்பட்டதாக உரிமையாளரினால் தெரிவிக்கப்பட்டது.

இதனடிப்படையில் நேற்று அதிகாலை கொடிகாமம் காவல்துறையினரால் சந்தேகத்தின் பேரில் ஒருவர் கைது செய்யப்பட்டுள்ளார்.

இந்த வன்முறைச் சம்பவத்தில் மிருசுவில் வடக்கு வீதியைச் சேர்ந்த 57 வயதான தம்பு ஜெயானந்தன் படுகாயமுற்றநிலையில் யாழ்போதனா வைத்தியசாலையிலும், மிருசுவிலை ஆயத்தடியைச் சேர்ந்த 23 வயதான பாலேந்திரன் றஜீபன் சாவகச்சேரி ஆதார வைத்தியசாலையிலும் சிகிச்சைக்காக சேர்க்கப்பட்டிருந்தனர் என்பது இங்கே நினைவூட்டத்தக்கது

No comments